Damwain oedd achos marwolaeth paragleidiwr o Fôn a fu farw o anaf i'w ben ar ôl disgyn i mewn i hen chwarel lechi yng Ngwynedd.

Bu farw Geoffrey Corser, 46 oed o Fiwmares, oedd yn hyfforddwr hedfan gyda'r Llu Awyr Brenhinol, yn chwarel Dinorwig ger Llanberis ar 23 Awst y llynedd.

Ddydd Mercher, daeth crwner cynorthwyol gogledd orllewin Cymru, Sarah Riley, i'r casgliad mai damwain oedd achos ei farwolaeth.

Dywedodd fod yr Is-gapten Corser wedi bod yn defnyddio gleider cyflym yn ardal Llanberis, a allai gyrraedd mwy na 40mya, pan gollodd rheolaeth.

Cafodd ei weld yn siglo o ochr i ochr cyn disgyn i mewn i dwll chwarel dwfn lle gwrthdarodd â wyneb craig, ar ôl syrthio tua 160 troedfedd i'r llawr.

Roedd yr Is-gapten Corser, oedd yn enedigol o Nottingham, wedi bod yn beilot ymladd gyda Llu Awyr De Affrica ar un adeg.

Ar ddiwrnod ei farwolaeth, roedd wedi bod gyda'i ffrind Christopher Heatley a ddisgrifiodd yr amodau fel rhai "llonydd iawn".

Roedd y dringwr Paul Hockin wedi gweld y paragleidiwr uwch ei ben cyn clywed sŵn "slap" a "bang" eiliadau'n ddiweddarach.

"Doedd e ddim yn ymddangos yn dda," meddai. "Roeddwn i'n teimlo nad oedd rhywbeth yn iawn."

Dywedodd Cymdeithas Paragleidio Prydain mewn adroddiad fod bron dim lle i wneud camgymeriadau ar ei lwybr hedfan.

Mewn datganiad, dywedodd Llu Awyr Brenhinol y Fali: "Gyda thristwch mawr y gall RAF Fali gadarnhau bod yr Is-gapten Hedfan Geoff Corser wedi cael ei ladd mewn damwain paragleidio tra'r oedd oddi ar ddyletswydd yn chwarel Dinorwig ar ddydd Sadwrn, 23 Awst 2025. 

"Bu farw Geoff wrth wneud rhywbeth yr oedd yn angerddol amdano mewn bywyd – hedfan.

"Roedd Geoff yn hyfforddwr hedfan uchel ei barch yn RAF Valley, yn cael ei barchu'n fawr gan ei gydweithwyr a'r myfyrwyr a ddysgodd."

Ychwanegodd: "Mae ein meddyliau gyda'i deulu a'i anwyliaid yn ystod yr amser anodd iawn hwn."

Roedd yn cael ei adnabod fel "Wolf" ar ôl gwasanaethu gyda Llu Awyr De Affrica.