Mae rhagor o dywydd garw ar y ffordd dros y penwythnos a dydd Llun wrth i’r gwaith barhau i adfer pwer i bron filiwn o gartrefi yn y DU ar ol Storm Éowyn.

Mae Storm Herminia wedi ei henwi a mae disgwyl iddi gyrraedd ddydd Sul gyda rhybuddion melyn newydd wedi eu cyhoeddi yng Nghymru.

Yn ôl cwmni Scottish Power roedd 5,000 o gwsmeriaid yng Nghymru heb drydan fore dydd Sadwrn ar ôl i rybudd oren ‘perygl i fywyd’ yng ngogledd Cymru ddod i ben nos Wener.

Roedd yna wyntoedd o hyd at 93mya ym Mhen Llŷn yng Ngwynedd fore Gwener, ac roedd degau o ysgolion ar gau ar draws siroedd y gogledd – gyda 65 ar gau yng Ngwynedd a bob un ar gau ar Ynys Môn.

Dyma oedd un o'r stormydd cryfaf ers degawdau yn Iwerddon a'r Alban a bu farw un dyn ar ôl i goeden daro ei gar yn Swydd Donegal.

Dywedodd y Swyddfa Dywydd ei bod yn storm “eithriadol” ac efallai'r cryfaf i daro rhai rhannau o'r DU "ers 20 i 30 mlynedd".

Yn yr Alban mae'r holl wasanaethau tren wedi eu canslo nes prynhawn dydd Sadwrn.

Mae rhybudd o rew i rannau o Gymru fore dydd Sadwrn cyn rhagor o rybuddion am wynt a glaw ddyddiau Sadwrn a Sul.

Inline Tweet: https://twitter.com/NewyddionS4C/status/1882851194873212988

Y rhybuddion

·             Rhybudd rhew rhwng 3.00 a 10.00 ddydd Sadwrn yn siroedd Blaenau Gwent, Pen-y-bont ar Ogwr, Caerffili, Caerdydd, Sir Gaerfyrddin, Ceredigion, Merthyr Tudful, Sir Fynwy, Castell-nedd Port Talbot, Casnewydd, Sir Benfro, Powys, Rhondda Cynon Taf, Abertawe, Torfaen a Bro Morgannwg.

·             Rhybudd gwynt rhwng 8.00 a 15.00 ddydd Sadwrn i bob sir yng Nghymru.

·             Rhybudd glaw rhwng 8.00 ddydd Sul a 6.00 ddydd Llun ym mhob sir yng Nghymru heblaw am Ynys Môn.

Gallai hyd at 80mm o law syrthio mewn rhannau o Gymru a Lloegr, meddai’r Swyddfa Dywydd.

Dywedodd meteorolegydd y Swyddfa Dywydd Jonathan Vautrey y bydd system gwasgedd isel arall yn symud o gyfeiriad y de orllewin ddydd Sul. 

“Bydd hyn yn dod â glaw trwm i mewn ar gyfer de-orllewin Lloegr a Chymru ac o ganol y bore ymlaen, bydd hynny’n lledu i Ogledd Iwerddon a gogledd Lloegr yn y prynhawn.

“Ni fydd y gwyntoedd mor gryf â Storm Éowyn,” meddai ond fe fyddwn nhw’n fwy deheuol.