Mae disgwyl i ddydd Iau a Gwener fod yn ddyddiau hynod o wyntog yng Nghymru gan gynnwys rhybudd oren “perygl i fywyd” am gyfnod wrth i Storm Éowyn gyrraedd.

Mae'r Swyddfa Dywydd wedi cyhoeddi rhybuddion coch prin i Ogledd Iwerddon a rhannau o'r Alban.

Mae rhybudd melyn am wynt mewn lle ar gyfer gorllewin a rhannau o dde Cymru ddydd Iau.

Ddydd Gwener, bydd y rhybudd gwynt yn gorchuddio'r wlad gyfan a rhybudd oren am “wyntoedd cryf iawn” yn y gogledd.

Mae rhybudd melyn am law hefyd wedi’i gyhoeddi ar draws llawer o Gymru ddydd Gwener, ac mae disgwyl cymaint â 60mm o law dros dir uchel, a allai arwain at rywfaint o lifogydd.

“Gallai malurion yn hedfan, yn ogystal â thonnau mawr a malurion yn cael eu taflu ar lan y môr, achosi anafiadau a pheryglu bywyd pobl,” meddai’r Swyddfa Dywydd.

Teithio

Mae nifer o gwmnïau trên wedi rhybuddio pobl i beidio â theithio yng ngogledd Cymru ac yn ardaloedd yn yr Alban. 

Mae Avanti West Coast, CrossCountry, a Grand Central ymhlith y rheiny sydd wedi rhybuddio teithwyr y bydd oedi i wasanaethau trên yn sgil “gwyntoedd, glaw ac eira cryf iawn".

Mewn datganiad ddydd Iau dywedodd National Rail bod rhybuddion am dywydd garw yn effeithio ar deithiau ar hyd arfordir Cymru a de Lloegr. 

Maen nhw hefyd wedi rhybuddio y bydd disgwyl i wasanaethau trên parhau i gael eu heffeithio ledled y Deyrnas Unedig yn ystod y dyddiau nesaf gan ddweud:

“Mae ‘na phosibilrwydd y bydd yn rhaid i drenau teithio’n arafach nag arfer gan achosi oedi i deithiau.”

'Aflonyddwch'

Mae Met Éireann, gwasanaeth tywydd Gweriniaeth Iwerddon, wedi cyhoeddi rhybudd coch ar gyfer y wlad honno i gyd gan rybuddio am “hyrddiau difrifol, niweidiol a hynod ddinistriol” dros 80mya.

Mae’r storm wedi ei achosi gan jetlif pwerus yn gwthio gwasgedd isel ar draws Môr yr Iwerydd a thuag at y DU ar ôl cyfnod o dywydd oer iawn dros UDA a Chanada.

Dywedodd Mike Silverstone, dirprwy brif feteorolegydd y Swyddfa Dywydd: “Mae disgwyl i Storm Éowyn ddod â gwyntoedd cryfion iawn ac aflonyddwch ar draws ardal eang ddydd Gwener. 

“Mae yna nifer o rybuddion tywydd mewn grym ar hyn o bryd, gyda phob rhan o'r DU yn dod o dan o leiaf un rhybudd tywydd rywbryd ddydd Gwener.

“Mae disgwyl i Storm Éowyn groesi Gogledd Iwerddon yn gynnar fore Gwener. Fe fydd wedyn yn parhau i’r gogledd-ddwyrain ar draws hanner gogleddol yr Alban yn ystod prynhawn Gwener a disgwylir iddo gyrraedd Shetland nos Wener.”

Inline Tweet: https://twitter.com/NewyddionS4C/status/1882383676316794894

Y rhybuddion

Bydd rhybudd melyn am wynt rhwng 07.00 a hannr nos ddydd Iau yn effeithio ar y siroedd canlynol:

• Pen-y-bont ar Ogwr
• Caerdydd
• Sir Gaerfyrddin
• Ceredigion
• Conwy
• Gwynedd
• Ynys Môn
• Sir Fynwy
• Castell-nedd Port Talbot
• Casnewydd
• Sir Benfro
• Abertawe
• Bro Morgannwg

Bydd rhybudd melyn am wynt ar gyfer Cymru gyfan drwy’r dydd ddydd Gwener. Fe fydd yna hefyd rybudd oren o 06.00 nes 21.00ar gyfer y siroedd canlynol:

• Conwy
• Sir Ddinbych
• Sir y Fflint
• Gwynedd
• Ynys Môn

Fe fydd yna hefyd rybudd melyn am law i’r siroedd canlynol rhwng hanner nos a 09.00 ddydd Gwener:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Ceredigion
• Conwy
• Gwynedd
• Merthyr Tudful
• Sir Fynwy
• Castell-nedd Port Talbot
• Casnewydd
• Sir Benfro
• Powys
• Rhondda Cynon Taf
• Abertawe
• Torfaen
• Bro Morgannwg