Mae dros 200 mlynedd o hanes addysg bellach yn Llambed ond am faint yn hirach bydd myfyrwyr yma?

Dyna bryder ymgyrchwyr wrth i Brifysgol Cymru y Drindod Dewi Sant ystyried symud eu holl gyrsiau israddedig i Gaerfyrddin o fis Medi.

Tu allan i'r Senedd yng Nghaerdydd, roedd eu neges yn glir.

"Mae 'na rywbeth arbennig ac unigryw am Llambed.

"Yn fy marn i a barn pobl eraill yma heddiw chi methu ail-greu y manteision i gyd yn Llambed a symud e i gyd mewn i dref arall."

"Mae'r ochr cymdeithasol hefyd, ochr y gymuned.

"Bydde cau'r campws yn Llambed a dod ag addysgu israddedig i ben yn golygu colli incwm i'r dref.

"Mae'r dref wedi dibynnu ar y coleg ers 200 mlynedd."

Yn dilyn protest tebyg ei faint fis ddiwethaf yn Llambed mae'r ymgyrchwyr wedi dod at risiau'r Senedd i wneud eu dadl nhw.

Eu gobaith nhw ydy os nad yw'r Brifysgol wedi gwrando hyd yma bod ganddyn nhw glust Aelodau'r Senedd.

Mae'r Aelod dros Ddwyrain Caerfyrddin a Dinefwr eisoes wedi galw ar y Brifysgol i bwyllo.

"Unwaith chi'n cau'r campws, mae 'di mynd.

"Yr holl hanes, ethos, a'r cyfle ar gyfer y dyfodol wedi chwalu.

"'Dan ni'n gofyn i'r Llywodraeth oedi.

"Mae etholiad ar y gorwel, mewn blwyddyn.

"Falle bydd newid polisi i newid y fframwaith cyllidol ar gyfer y prifysgolion i gyd."

Mae'r Brifysgol wedi dweud bod dyfodol Campws Llambed o bwysigrwydd mawr iddynt a'u bod yn parhau i drafod efo gwahanol sefydliadau i sicrhau dyfodol llwyddiannus ac economaidd gynaliadwy i'r safle.

Mae Llywodraeth Cymru yn cadw llygad ar y sefyllfa.

Hynny, yn ystod be all fod yn flwyddyn olaf yn Llambed i rai o'r myfyrwyr yma.