Yn ôl adroddiadau, mae o leiaf 66 o bobl wedi eu lladd wrth i dân gynnau mewn gwesty yn Nhwrci.  

Cynheuodd y tân yng ngwesty'r Grand Kartal tua 3.30 y bore, amser Twrci, mewn cyrchfan gwyliau sgio yn Kartalkaya. 

Mae dwsinau yn rhagor wedi eu hanafu.  

Mae pedwar o bobl wedi eu harestio, yn cynnwys perchennog y gwesty, yn ôl gweinidog cyfiawnder Twrci.    

Fe gymerodd 12 awr i ddiffodd y fflamau. 

Mae'n gyfnod gwyliau yn Nhwrci ar hyn o bryd, ac roedd 234 o bobl yn aros yn y gwesty.  

Mae lluniau wedi eu rhannu yn dangos pobl yn ceisio ffoi drwy ffenestri'r adeilad. 

Yn ôl adroddiadau cynnar, fe gynheuodd y tân ym mwyty'r gwesty sydd ar y pedwerydd llawr, gan ymledu i'r lloriau uwchben. 

Oherwydd lleoliad y gwesty ac amodau'r tywydd rhewllyd, fe gymerodd fwy nag awr i griwiau tân gyrraedd y safle.