Mae rhan o lwybr arfordirol yn Sir Benfro wedi cau unwaith eto yn dilyn sawl tirlithriad yn yr ardal dros yr wythnos diwethaf. 

Fe gafodd y llwybr ger Llanusyllt ei gau yn dilyn problemau tebyg diwedd 2023 a chynnar yn y flwyddyn yn 2024. 

Mae tirlithriadau ger pen gorllewinol Wisemans Bridge tuag at lwybr seiclo Coppet Hall bellach wedi effeithio ar fynediad rhwng Wisemans Bridge a thraeth Coppet Hall. 

Mae Cyngor Sir Benfro wedi derbyn cyngor gan arbenigwyr i gau rhan o’r llwybr nes bod modd ei drwsio. 

Image

Yn ôl llefarydd ar ran Cyngor Sir Benfro fe allai’r tywydd gaeafol o bosib fod wedi chwarae rhan yn y tirlithriad, sydd wedi golygu bod nifer o greigiau wedi cwympo ar hyd y llwybr.

Dywedodd y llefarydd bod y cyngor bellach yn ystyried adolygu’r rhesymau a achosodd creigiau i gwympo yno, yn ogystal â’r gwaith atgyweirio “angenrheidiol” sydd ei angen. 

Ond maen nhw wedi rhybuddio y byddai’r gwaith hyn yn debygol o gymryd “misoedd.” 

Roedd Cabinet Cyngor Sir Benfro wedi cymeradwyo gwaith cynnal a chadw gwerth tua £600,000 ar y llwybr mis Mawrth diwethaf. 

Roedd yr awdurdod yn gobeithio y byddai’r gwaith wedi ei gwblhau erbyn gwyliau’r haf y llynedd. 

Ond roedd “gwaith ychwanegol” – gan gynnwys mynd i’r afael â thirlithriad arall a ddigwyddodd – wedi golygu nad oedd modd ail agor y llwybr tan ddechrau mis Awst.