Bydd Clybiau Ffermwyr Ifanc Cymru yn cynnal eu cynhadledd amaeth a seremoni wobrwyo flynyddol ddydd Sadwrn.

Unwaith eto eleni, bydd CFfI Cymru cynnal Cynhadledd Amaeth a Gwobrau Amaeth, a’r tro yma fe fydd y gynhadledd ar Fferm Rosedew, Llanilltud Fawr.

Dywedodd Dominic Hampson-Smith, cadeirydd Pwyllgor Materion Gwledig CFfI wrth Newyddion S4C: “Fel pwyllgor rydym yn teimlo ei fod yn ffordd wych o ddod â’n haelodau ynghyd i drafod a dysgu safbwyntiau eraill gan arweinwyr yn y diwydiant,"

Testun y gynhadledd eleni fydd ‘Mentro ar Lwyddiant’, a bydd pump o siaradwyr o ddiwydiannau gwahanol yn rhoi eu mewnbwn ar y pwnc.

Dywedodd Dominic: “Rydym bob amser yn dewis thema sy’n gweddu i hinsawdd bresennol amaethyddiaeth i’r gorau y gallwn ni.”

Drwy wneud hyn, maent yn “sicrhau ei bod yn ddeniadol ac yn berthnasol i’n haelodau,” meddai.

Fel rhan o’r gynhadledd eleni, bydd y Noson Wobrwyo Amaeth yn cael ei chynnal am yr ail dro.

Dywedodd Dominic bod y penwythnos wedi “dod yn uchafbwynt i galendr y CFfI.”

Mae 12 aelod o’r ffermwyr ifanc wedi eu henwebu ar gyfer chwe gwobr, a bydd yr enillydd yn cael ei gyhoeddi erbyn diwedd y noson.

“Mae’n gyfle gwych i arddangos y gorau o’n haelodau ac i ddangos y dalent ddatblygol sydd gan amaethyddiaeth i’w chynnig.” meddai.

Y chwe gwobr fydd yn cael ei chyflwyno fydd:

• Cynhyrchydd Stoc y Flwyddyn 
• Gwobr Arallgyfeiriad Gorau 
• Gwobr Pencampwr Gwledig 
• Gwobr Rheoli Glaswelltir Gorau 
• Gwobr Stocmon Llaeth Cynaliadwy
• Pencampwr Iechyd Meddwl 

Bydd cyfle hefyd i’r aelodau gael mynd ar daith fferm o amgylch Fferm Pancross ym Morgannwg.