Dedfrydu Stuart Hogg ar ôl iddo bledio'n euog i gamdriniaeth ddomestig
Mae cyn gapten rygbi'r Alban Stuart Hogg wedi cael ei ddedfrydu ar ôl pledio'n euog i gamdriniaeth ddomestig.
Cafodd Hogg, sy'n 32 oed, ei ddedfrydu i orchymyn ad-dalu cymunedol gyda blwyddyn o oruchwyliaeth.
Mae hefyd wedi derbyn gorchymyn pum mlynedd i beidio ag aflonyddu ei wraig.
Mae'r ddau wedi gwahanu ers tro.
Mae dedfryd gorchymyn ad-dalu cymunedol yn debyg i waith di-dâl ac yn cynnwys gweithgareddau fel cael gwared ar graffiti neu waith clirio.
Cafodd Hogg ei ddedfrydu yn Llys Siryf Selkirk ddydd Iau ar ôl iddo gyfaddef cam-drin ei wraig dros gyfnod o bum mlynedd.
Plediodd yn euog i un cyhuddiad o gamdriniaeth ddomestig o'i gyn bartner, Gillian Hogg ar 4 Tachwedd.
Roedd eisoes wedi ei wahardd rhag cysylltu gyda Mrs Hogg am bum mlynedd ar ôl iddo gyfaddef torri amodau mechnïaeth trwy gysylltu â hi dro ar ôl tro ym mis Mehefin, pan dderbyniodd hi 28 neges destun ganddo mewn un noson.
Fe wnaeth Hogg ymddeol o rygbi proffesiynol ym mis Gorffennaf 2023, ond yr haf diwethaf cyhoeddwyd ei fod yn dychwelyd i'r gamp ar ôl arwyddo i Montpellier ar gytundeb dwy flynedd.
Derbyniodd MBE am wasanaethau i’r gamp yn rhestr Anrhydeddau’r Flwyddyn Newydd y llynedd.
Llun: Andrew Milligan/PA
