Mae un o benaethiaid y Gwasanaeth Iechyd wedi rhybuddio am y risg  “a allai fod yn farwol” o “driniaethau cosmetig corfforol rhad" gan gynnwys codi’r pen-ôl dros gyfnod y Nadolig.

Mae’r GIG wedi gweld nifer o driniaethau gan glinigau tramor yn cynnig gostyngiadau o 25% a phecynnau hollgynhwysol gan gynnwys gwestai a hediadau am lai na £3,000, yn ogystal â bargeinion costau mewn ymgais i “ddenu pobl”.

Triniaeth i godi’r pen-ôl (BBL) sydd â'r gyfradd marwolaeth uchaf o'r holl driniaethau cosmetig oherwydd gall y braster sy'n cael ei chwistrellu i'r pen-ôl arwain at emboledd yn yr ysgyfaint, sef rhwystr mewn pibell waed yn yr ysgyfaint a all fod yn angheuol.

Mae sgîl-effeithiau difrifol eraill yn cynnwys haint y croen, llid yr isgroen, yn ogystal â chreithiau lwmpog o amgylch ardal y llawdriniaeth.

Dywedodd cyfarwyddwr meddygol GIG Lloegr, yr Athro Syr Stephen Powis, er y gallai’r rhain ymddangos yn “gynigion deniadol” yn y cyfnod cyn y Nadolig, y gwir amdani yw bod “y triniaethau cosmetig rhad hyn yn gallu bod yn farwol”.

Daw yn dilyn cyfres o farwolaethau a chymhlethdodau meddygol sy’n deillio o driniaethau sydd wedi mynd o chwith, gyda’r gwasanaeth iechyd yn gorfod trin cleifion yn rheolaidd pan fyddant yn dychwelyd adref.

Baich ariannol

Mae Cymdeithas Llawfeddygon Plastig Esthetig Prydain (BAAPS) wedi cynghori ei haelodau i beidio â chynnal llawdriniaeth BBL, sydd, yn ôl y GIG, wedi cynyddu’r risg y bydd pobl yn cael triniaethau anniogel dramor.

Dywedodd y gwasanaeth iechyd fod clinigau tramor wedi bod ar flaen y gad o ran gweithdrefnau cosmetig aflwyddiannus yn ystod y blynyddoedd diwethaf gyda llawdriniaeth BBL “yn costio cymaint â 70% yn llai nag yn y DU”.

Dywedodd Syr Stephen: “Ar adeg pan nad yw staff y GIG erioed wedi bod yn brysurach, y peth olaf sydd ei angen arnynt yw cleifion yn troi i fyny wrth eu drws gyda chymhlethdodau meddygol yn dilyn BBL gan lawfeddyg dramor nad yw’n cael ei reoleiddio.

“Er y bydd cynigion deniadol yn y cyfnod cyn y Nadolig, y gwir amdani yw bod y gweithdrefnau cosmetig rhad hyn yn gallu bod yn farwol.

“BBLs sydd â’r gyfradd farwolaeth uchaf o’r holl achosion o’r fath, ac yn aml iawn fe’i gadweir i’r GIG ysgwyddo’r baich i dalu’r bil.

“Bydd y GIG yna bob amser i’r rhai sydd ei hangen ond ni ddylid ysgwyddo’r baich ariannol am atgyweirio triniaethau o’r fath.”

Llun gan Philippe Spitalier.