Mae merch 14 oed wedi dioddef anafiadau difrifol mewn gwrthdrawiad yn Nhreffynnon fore Mercher.

Fe wnaeth Heddlu Gogledd Cymru dderbyn adroddiadau fod Honda Civic coch wedi gwrthdaro â merch 14 oed.

Digwyddodd y gwrthdrawiad am 08.00 ar Ffordd Holway, meddai'r llu.

Mae'r ferch wedi dioddef anafiadau difrifol a chafodd ei chludo i'r ysbyty mewn ambiwlans awyr.

Bydd y ffordd yn parhau ar gau wrth i'r heddlu ymchwilio i'r digwyddiad.

Mae'r Rhingyll Medwyn Williams o’r Uned Troseddau Ffyrdd yn apelio am dystion a gwybodaeth i'r gwrthdrawiad.

“Rwy’n annog unrhyw un a allai fod wedi bod yn teithio ar hyd Ffordd Holway toc cyn 8.00 y bore yma ac a allai fod â lluniau camerâu cylch cyfyng i gysylltu â ni cyn gynted â phosibl," meddai.

“Bydd y ffordd yn parhau ar gau am beth amser er mwyn galluogi swyddogion i gynnal eu hymchwiliad cychwynnol a hoffen ni ddiolch i’r gymuned leol ymlaen llaw am eu hamynedd.”

Gallai unrhyw un sydd â gwybodaeth gysylltu â Heddlu Gogledd Cymru drwy ddyfynnu'r cyfeirnod Q189599.

Llun: Google