Mae prif dyst arbenigol yr achos yn erbyn Lucy Letby wedi mynnu bod ei dystiolaeth yn gadarn, gan ddweud ei fod yn synnu "cyn lleied" roedd e wedi newid ei feddwl yn ystod yr achos. 

Ar ol cael ei chanfod yn euog o lofruddio saith babi a cheisio llofruddio saith arall tra'n gweithio yn Ysbyty Countess of Chester, mae'r cyn-nyrs dan glo ar hyn o bryd ar ôl cael ei dedfrydu i 15 tariff gydol oes.

Ddoe, dywedodd tim cyfreithiol Letby eu bod yn galw ar y Llys Apel i adolygu ei holl euogfarnau, gan ddweud bod prif dyst yr erlyniad, y Cymro Dr Dewi Evans yn "annibynadwy" a'i fod wedi "newid ei feddwl am achos marwlaeth tri o'r babanod".

Mewn cyfweliad egsgliwsif gyda Newyddion S4C, mae Dr Evans wedi dweud bod y sylwadau yna yn "rhyfeddol, di-sail ac anghywir".

Dywedodd y cyn ymgynghorydd ysbyty mewn gofal plant mai'r unig newid mae e wedi ei gyflwyno ydy cadarnhau dyddiad marwolaeth babi C.

"Yn gynharach eleni, sylweddolais bod dryswch o gylch un dyddiad. Es i felly drwy'r dystiolaeth o'r dechrau i'r diwedd i gadarnhau beth oedd wedi digwydd."

"Wrth wneud hynny, ges i gadarnhad bod pryder oedd gen i nôl yn 2017 am pryd fu farw'r babi yn gywir. Ar y pwynt yna, doedd gen i ddim gwybodaeth o gwbl bod Lucy Letby ar y ward heb son am fod yn gofalu am y babi."

"Roedd pryder gen i - wrth gwrs, roedd angen mwy o dystiolaeth wedyn gan yr heddlu a thystion eraill i benderfynu beth oedd wedi digwydd."

Mae Dr Evans yn mynnu mai camgymeriad "syml" ar ran yr erlyniad oedd yn gyfrifol, ond nad yw hynny yn effeithio o gwbl ar y dystiolaeth wyddonol gyflwynwyd yn yr achos.

Gwadodd bod hynny'n creu unrhyw amheuaeth am euogrwydd Letby, gan ddweud ei bod hi'n naturiol i arbenigwr newid eu meddwl "wrth i dystiolaeth newid ac esblygu" a'i fod e wedi "synnu" at gyn lleied newidodd ei farn yn ystod yr achos.

Roedd Dr Evans wedi dweud yn flaenorol wrth raglen File on Four Radio 4 ei bod hi'n debygol i fabi C farw wedi i "gyfuniad o laeth ac aer" gael eu pwmpio i'w stumog, oedd yn wahanol i'r hyn ddywedodd yn y llys lle crybwyllwyd aer yn unig.

Wedi iddo ymddangos ar y rhaglen, dywedodd wrth y BBC ei fod wedi "adolygu yr amgylchiadau arweiniodd ar farwolaeth Babi C" a'i fod yn credu ei bod hi'n "fwy tebygol" mai chwistrellu aer i'r gwaed oedd achos "mwyaf tebygol" y farwolaeth, gan ddweud byddai naill neu'r llall yn "anaf clwyfol".

Mewn datganiad, dywedodd Mark McDonald KC, sydd yn amddiffyn Lucy Letby:

"Mae Dr Evans wedi ysgrifennu adroddiad newydd ar babi C, 12 mis ar ôl i Lucy Letby gael ei chanfod yn euog, plis all hwn gael ei ddatgelu i'r amddiffyniad. Mae dibynadwyedd unrhyw dyst arbenigol meddygol yn fater nawr i'r llys apel."