Mae dyn yn ei 80au wedi’i garcharu am ymosod yn rhywiol ar ddwy ferch ifanc yng Nghaerdydd. 

Fe blediodd Royston Gill, 81 oed, yn euog o ddau achos o ymosod ar ferch o dan 13 oed trwy gyffwrdd ym mis Awst 2023 a mis Gorffennaf 2024.

Cafodd ddedfryd estynedig o naw mlynedd yn cynnwys pum mlynedd dan glo a chyfnod trwydded o bedair blynedd.

Cafodd Mr Gill o Ogledd Llandaf ei ddedfrydu yn Llys y Goron Caerdydd ar 27 Tachwedd. 

Clywodd y llys ei fod yn peri risg sylweddol i blant er ei fod yn ymddangos yn fregus. 

Dywedodd y Ditectif Gwnstabl Rhiannon Phillips o Heddlu De Cymru ei bod eisiau canmol “dewrder y dioddefwyr” wedi iddyn nhw gysylltu â’r heddlu.

“Mae wedi bod yn gyfnod trawmatig i bawb dan sylw ac rwy’n gobeithio y byddai’r canlyniad llys yn cynnig ychydig o gysur", meddai.

Dywedodd bod Heddlu De Cymru yn cymryd trais rhywiol “o ddifrif” a’u bod yn annog dioddefwyr i gysylltu ar bob achlysur.