Mae'r heddlu'n apelio am wybodaeth wedi adroddiadau fod dau ddyn wedi ymosod ar ddyn arall cyn ei roi mewn cerbyd yng Nghwmbran, Sir Torfaen, nos Wener. 

Yn ôl adroddiadau, cafodd y dyn ei roi mewn car lliw tywyll ger cyffordd Clôs Pant Gwyn.  

Y gred yw fod yr ymosodiad honedig wedi digwydd toc cyn 23:00.

Dywedodd y Ditectif Arolygydd Ian Bartholomew o Heddlu Gwent: "Parhau mae ein hymchwiliad i geisio dod o hyd i'r dioddefwr, a cheisio adnabod y ddau ddyn arall. 

"Rydym yn apelio ar unrhyw un a welodd unrhyw beth amheus yn yr ardal i gysylltu â ni."

2400397020 yw'r rhif i'w nodi, gydag unrhyw wybodaeth berthnasol.