Mae’r gwasanaethau brys wedi gofyn i bobl adael nifer o gartrefi yn Abertyleri, yn ôl y cyngor sir.

Daw hyn wrth i fideos a gyhoeddwyd ar y cyfryngau cymdeithasol awgrymu bod tirlithriad wedi digwydd yn y dref ym Mwrdeistref Sirol Blaenau Gwent.

Mae’r delweddau'n dangos mwd mewn stryd ger ceir ac adeiladau. Dywedodd un llygad-dyst Wayne Green ei fod yn ymddangos bod tirlithriad wedi digwydd yno a'i fod yn "ofnadwy".

Does dim adroddiadau eto am unrhyw anafiadau.

Dywedodd Cyngor Blaenau Gwent fod cynnig i bobl lochesu mewn canolfan chwaraeon gyfagos.

Mewn datganiad, dywedodd Cyngor Blaenau Gwent: “Rydym yn ymwybodol bod y gwasanaethau brys wedi gofyn i bobl adael nifer o gartrefi yn ardal Cwmtyleri yn Abertyleri.

“Rydym yn gwneud trefniadau ar gyfer y rhai sydd wedi'u heffeithio ac mae canolfan lloches wedi'i sefydlu yng Nghanolfan Chwaraeon Abertyleri. 

“Rydym ar y safle gyda phartneriaid yn asesu'r sefyllfa.”

Daw'r digwyddiad yn sgil glaw trwm iawn ar ôl Storm Bert dros y penwythnos.

Llun: Gail Abbie.