Mae'r gwasanaethau brys wedi ailddechrau'r chwilio fore dydd Sul am redwr coll yn ardal Llanrwst yn Sir Conwy.

Mae'r ardal rhwng Llanrwst a Threfriw wedi profi llifogydd yn ystod y dyddiau diwethaf o ganlyniad i Storm Bert.

Yn ôl adroddiadau fe ddechreuodd yr ymdrech nos Sadwrn i ddod o hyd i'r dyn ar ôl i'w deulu godi pryder amdano wedi iddo fethu a dychwelyd ar ôl bod yn rhedeg gyda'i gi.

Roedd gwasanaeth Gwylwyr y Glannau ynghyd â Thîm achub Mynydd Ogwen wedi rhoi cymorth i Heddlu Gogledd Cymru yn y chwilio.

Dywedodd llefarydd ar ran y tîm achub mynydd wrth Newyddion S4C fore dydd Sul eu bod nhw’n dal yn yr ardal.

Dywedodd Gwylwyr y Glannau fod hofrennydd o Gaernarfon wedi ymuno â’r chwilio a bod y chwilio “wedi dod i ben”.

Dywedodd llefarydd ar ran Gwylwyr y Glannau: "Cafodd Gwylwyr y Glannau EF y dasg o gynorthwyo Heddlu Gogledd Cymru i chwilio am redwr coll yn Llanrwst ddoe, [dydd Sadwrn] 23 Tachwedd am tua 6:15pm. 

"Cafodd hofrennydd Gwylwyr y Glannau o Gaernarfon ei anfon ochr yn ochr â Thîm Achub Ogwen. 

"Daeth yr hofrennydd â’r chwilio i ben neithiwr."

Llun: Mostyn Jones