Mae teulu merch 14 oed fu farw ar ôl argyfwng meddygol mewn clwb rygbi wedi rhoi teyrnged iddi.

Bu farw Seren Jenkins o Dŷ-croes, Rhydaman ddydd Gwener yr wythnos diwethaf yng nghlwb rygbi Yr Aman.

Dywedodd ei theulu bod eu “calonnau wedi torri wrth golli merch a chwaer fawr a bach mor gariadus”.

“Bu i Seren fyw ei bywyd byr i’r eithaf ac roedd yn artist, chwaraewr rygbi ac wrth ei bodd ar y cyfryngau cymdeithasol,” medden nhw.

“Roedd Seren yn cael ei charu gan bawb oedd yn ei hadnabod a bydd yn cael ei chofio hefyd am ei synnwyr digrifwch.

“Hoffem achub ar y cyfle hwn i ddiolch i’r gwasanaethau brys a ddaeth i’r fan a’r lle, a phawb sydd wedi rhoi arian i’r dudalen GoFundMe.

“Bydd yr elw yn debygol o gael ei roi i wahanol wasanaethau asthma, Ambiwlans Awyr Cymru, a chofeb bosibl i ffrindiau gael cofio amdani.”

Ychwanegodd ei theulu: “Hoffem hefyd achub ar y cyfle hwn i ddiolch i bobl am eu geiriau caredig a’u cefnogaeth ar yr adeg erchyll hon, ond hoffem nawr ofyn am yr amser hwn i alaru yn breifat.”

Dywedodd Clwb Rygbi Yr Aman mewn neges ar y cyfryngau cymdeithasol ddydd Sadwrn yr wythnos diwethaf fod y clwb ar gau a'r holl gemau wedi eu gohirio "yn sgil amgylchiadau nad oedd modd eu rhagweld ac fel arwydd o barch".