Mae dros 140 o ysgolion wedi cau yn y gogledd ddwyrain a'r canolbarth o achos yr eira. 

Mae rhai ffyrdd hefyd wedi cau gyda rhybudd am amodau gyrru gwael yn y gogledd-ddwyrain.

Daeth rhybudd melyn am eira a rhew i rym ar draws y gogledd nos Lun, gan barhau mewn grym tan 11.00 fore Mawrth.

Bydd siroedd Conwy, Gwynedd, Powys, Sir Ddinbych, Sir Y Fflint a Wrecsam yn cael eu heffeithio.

Mae Heddlu'r Gogledd wedi rhybuddio gyrwyr i gymryd gofal ar y ffyrdd ac i ystyried peidio â theithio nes bod y tywydd yn gwella.

Daw’r rhybuddion pennaf yn y gogledd ddwyrain yn dilyn trafferthion ar yr A55 a'r A483 yn Sir y Fflint a Wrecsam dros nos.

Image

Roedd yr eira wedi achosi amodau gyrru gwael, gan arwain at sawl damwain yn y siroedd dwyreiniol.

Dywedodd yr heddlu bod holl brif ffyrdd Sir y Fflint a Wrecsam bellach ar agor.

Ond maen nhw'n rhybuddio bod amodau gyrru gwael yn parhau.

"Byddem yn eich annog i deithio dim ond os yw’n gwbl angenrheidiol, gyda’r rhybudd tywydd yn ei le tan 11.00," meddai'r heddlu.

Pa ysgolion sydd ar gau?

Yn Sir Ddinbych, mae nifer o ysgolion wedi cau o achos y tywydd. Mae'r wybodaeth ddiweddaraf yma.

Yn Wrecsam, mae nifer o ysgolion ar gau. Mae'r wybodaeth ddiweddaraf yma.

Mae nifer o ysgolion hefyd ar gau yn Sir Y Fflint. Mae'r wybodaeth ddiweddaraf yma.

Mae'r eira hefyd wedi effeithio ar Bowys, gyda nifer o ysgolion wedi cau yn y sir honno hefyd. Mae'r wybodaeth ddiweddaraf yma. 

Dywedodd y Swyddfa Dywydd ei fod yn debygol y bydd cyfnodau o law ac eirlaw, gyda hyd at 20 cm o eira yn disgyn ar fryniau a mynyddoedd. 

Mae "tebygolrwydd isel" y gallai tai golli cyflenwadau trydan ac i wasanaethau trên a bws gael eu heffeithio.

Mae'r Swyddfa Dywydd hefyd yn rhybuddio cerddwyr a beicwyr i gymryd gofal, gan fod rhew yn gallu gwneud palmentydd a llwybrau seiclo yn llithrig.

Llun: Pentref Llanfair Talhaiarn yng Nghonwy gan Eirian Jones