Mae 'difrod sylweddol' wedi cael ei greu yng Nghlwb Golff Pwllheli yng Ngwynedd wedi adroddiadau fod car wedi ei yrru ar y cwrs. 

Mewn datganiad ar y cyfryngau cymdeithasol ddydd Llun, dywedodd y clwb golff fod "car wedi bod ar y cwrs a wedi creu difrod sylweddol ar yr 11eg twll."

Image

Ychwanegodd y clwb bod darganfod hynny yn "drist iawn" a bod yr heddlu wedi cael gwybod am y digwyddiad. 

Mae'r clwb golff yn annog unrhyw un sydd  â gwybodaeth neu sydd wedi sylwi ar gar yn gyrru'n amheus o gwmpas yr ardal dros y penwythnos i gysylltu â'r heddlu. 

Llun: Clwb Golff Pwllheli