Bydd Gŵyl Aled, sef yr Wŷl Cerdd Dant eleni, yn cael ei chynnal yn Yr Wyddgrug ddydd Sadwrn.

Mae'r ŵyl eleni yn cael ei chynnal yn y dref er cof am y diweddar Dr Aled Lloyd Davies, cerddor ac arbenigwr yn y maes, fu farw yn 2021 yn 90 oed. 

Fe gafodd yr wyl ei chynnal ddiwethaf yn y dref ym 1998, gyda Dr Aled yn gadeirydd ar y pwyllgor gwaith bryd hynny. 

Roedd hefyd yn gadeirydd ar ddwy Eisteddfod Genedlaethol a gafodd eu cynnal yn Yr Wyddgrug ym 1991 a 2007. 

Fe gafodd ei urddo'n Gymrawd yr Eisteddfod Genedlaethol am ei gyfraniad i ddiwylliant Cymru yn 2004. 

Wrth siarad ar raglen Newyddion S4C nos Wener, dywedodd Cadeirydd y Pwyllgor Gwaith Hywel Wyn Edwards: "Aled Lloyd Davies wrth gwrs, byw yma yn Yr Wyddgrug ers blynyddoedd lawer. 

"Bu Aled farw deuddydd cyn ei benblwydd yn 91 oed tair blynedd a hanner yn ôl bellach.

"Roeddem ni yn yr ardal wedi methu talu teyrnged i Aled a dweud diolch yn fawr wrtha fo am yr holl bethe ma' 'di neud nid yn unig i'r Wyddgrug a Sir y Fflint ond i Gymru benbaladr, a dyma'n cyfle ni felly mi gawson ni'r ŵyl i ddod yma yn 2024 a dyma ni, 'dan ni wedi cyrraedd."

'Dod at ein gilydd'

Bethan Bryn a Mair Carrington Roberts fydd llywyddion y dydd, gyda Beryl Lloyd Davies, Selwyn Evans, Mair Selway, Elwyn P Roberts, Mary Roberts a Goronwy Wynne yn llywyddion anrhydeddus. 

Nic Parry, Rhian Parry a Dei Tomos fydd yn arwain yn ystod y diwrnod. 

Fe fydd yr ŵyl yn cael ei chynnal yn Ysgol Bryn Coch. 

Dywedodd Trysorydd y Pwyllgor Gwaith, Anne Evans: "Ma'r pobl leol wedi bod yn ffantastig o feddwl bo' ni 'mond nepell o'r ffin, 'dan ni gyd wedi dod at ein gilydd, cael nifer o weithgareddau a mi ddo'th y gronfa leol mewn dim o dro a dwi'n reit falch bo' ni'n gallu deud hynny."