Mae Ioan Cunningham wedi ymddiswyddo fel prif hyfforddwr tîm rygbi merched Cymru.

Dywedodd Undeb Rygbi Cymru (URC) ddydd Gwener eu bod wedi cytuno, ar y cyd â Cunningham, i ddod â'i gyfnod yn y swydd i ben wedi tair blynedd.

Daw wedi i URC ymddiheuro am y ffordd y cafodd trafodaethau cytundeb tîm y merched eu cynnal, lai na blwyddyn ers adolygiad annibynnol damniol i ddiwylliant yr undeb.

Roedd tîm Ioan Cunningham hefyd ar rediad gwael ar ôl ennill pedair allan o’u 11 gêm yn unig yn y flwyddyn ddiwethaf.

Ymunodd Cunningham â’r tîm hyfforddi fel prif hyfforddwr dros dro yn Hydref 2021 cyn cael ei benodi’n barhaol fis yn ddiweddarach gyda’r nod o arwain y tîm i Gwpan y Byd 2025.

Yn hwyrach ymlaen yn 2021, dan arweinyddiaeth Cunningham, llwyddodd y tîm i gyrraedd y chwarteri yng Nghwpan Rygbi’r Byd yn Seland Newydd, er i’r tîm ennill un gêm yn unig a hynny o drwch blewyn yn erbyn yr Alban yng ngemau’r grŵp.

Daeth dechrau newydd yn 2022 wrth i 12 o chwaraewyr benywaidd gael cytundebau am y tro cyntaf, gan droi’r gêm rygbi menywod yn broffesiynol. 

Pencampwriaeth y Chwe Gwlad 2023 oedd uchafbwynt ei gyfnod wrth y llyw gyda’i dîm yn llwyddo i ennill tair o’r pum gêm gan guro Iwerddon, Yr Alban a’r Eidal, a gorffen yn drydydd.

Ym mis Medi eleni, cyhoeddodd yr Undeb eu bod wedi cynnig cytundebau dwy flynedd i 37 o chwaraewyr y tîm wrth baratoi at Gwpan y Byd flwyddyn nesaf yn Lloegr.

Mewn e-bost a welwyd gan y BBC, cafodd chwaraewyr eu bygwth gan y posibilrwydd y byddai’r tîm yn tynnu allan o’r WXV2 ac yn sgil hynny, Cwpan Rygbi’r Byd 2025. 

Cafodd y chwaraewyr cynnig terfynol o dair awr i arwyddo’r cytundebau, neu wynebu colli eu cytundeb.