Fe fydd Llywydd NFU Cymru yn rhybuddio Llywodraeth y DU fod rhaid iddyn nhw "wyrdroi eu diwygiadau treth cam-arweiniol" er mwyn amddiffyn ffermydd teuluol. 

Fe fydd Aled Jones  yn annerch ffermwyr a chynrychiolwyr y gadwyn fwyd yng Nghynhadledd NFU Cymru yn Llandrindod ym Mhowys ddydd Iau.

Cyhoeddodd y Canghellor Rachel Reeves yr wythnos diwethaf newidiadau i'r dreth etifeddiaeth ar ffermydd yn ei Chyllideb.

O fis Ebrill 2026 ymlaen, bydd yn rhaid talu treth ar raddfa o 20% ar dir ac asedau amaethyddol gwerth dros £1 miliwn. 

Bydd yn rhaid talu'r dreth yma dros gyfnod o 10 mlynedd ar unrhyw swm yn uwch na £1m, er y gallai'r ffigwr yna fod yn £2m mewn achosion lle mae cwpwl yn gadael eu heiddo i blant neu blentyn.

Mae arbenigwyr treth wedi awgrymu y gallai’r newidiadau effeithio ar lai na 500 o ffermydd y flwyddyn.

Inline Tweet: https://twitter.com/NewyddionS4C/status/1854611506744172660

'Bygythiad'

Mae disgwyl i Aled Jones ddweud nad oes "amheuaeth fod penderfyniad y Canghellor yr wythnos diwethaf i gyflwyno treth etifeddiaeth ar ein ffermydd teuluol i'r genhedlaeth nesaf yn mynd i adael nifer o ffermwyr heb y gallu, hyder na'r cymhelliant i fuddsoddi yn nyfodol eu busnes.

"Mae'r newidiadau a gafodd eu cyhoeddi nid yn unig yn fygythiad i strwythur y fferm deuluol ond hefyd i ddiogelwch bwyd ein cenedl ni. Mae hyn yn dod gan y Llywodraeth a ddywedodd ychydig fisoedd yn ôl fod 'diogelwch bwyd yn ddiogelwch cenedlaethol'.

Mae NFU Cymru hefyd yn galw ar Lywodraeth Cymru i gynnig sefydlogrwydd wrth iddyn nhw gyhoeddi eu cyllideb ddrafft. 

Bydd Mr Jones yn ychwanegu yn y gynhadledd ddydd Iau: "Tra bod cyllideb San Steffan wedi hawlio lot o'r sylw yr wythnos diwethaf, mae ein sylw ni hefyd ar y gyllideb ddrafft ym Mae Caerdydd ym mis Rhagfyr."