Mae menyw o Geredigion sydd wedi dioddef cam-driniaeth domestig eisiau codi ymwybyddiaeth am y gefnogaeth sydd ar gael i ddioddefwyr.

Profodd Mari Lewis, 24 oed, o Lanbedr Pont Steffan gam-driniaeth domestig yn ystod cyfnod "anodd" iddi.

“O’n i’n byw pob dydd mewn ofn o sut o’n i’n mynd i gal fy nhrin ac eto, ansicrwydd o beth oedd yn mynd i ddigwydd o ddydd i ddydd – odd e’n adeg anodd.”

Ar ôl derbyn cefnogaeth gan Wasanaeth Trais Domestig Gorllewin Cymru, mae hi’n awyddus i godi ymwybyddiaeth am yr help sydd ar gael.

Wrth siarad â Newyddion S4C, dywedodd fod “pob sefyllfa yn wahanol ac mae’n anodd dod i dermau gyda’r ffaith eich bod yn cael eich cam-drin.”

“Does neb yn haeddu gorfod byw mewn ofn o bobl sydd i fod eu caru nhw,” meddai.

“Sen i’n meddwl bod digon o wasanaethau i gal mas 'na oes, ond y broblem fwyaf sen i’n meddwl yw cal y cymorth ‘na mas i’r bobl sydd rili angen e.”

“Fi’n credu fod angen codi mwy o ymwybyddiaeth am y cymorth sydd mas ‘na achos yn bersonol - o’n i ddim yn ymwybodol am yr elusen [Gwasanaeth Cam-drin Domestig Gorllewin Cymru] nes bod fi yn y sefyllfa fy hunan.”

'Unig'

Flwyddyn yn ôl, gosododd Mari her i’w hun i gerdded llwybr arfordir Cymru i gyd o fewn y flwyddyn er mwyn codi arian i Wasanaeth Trais Domestig Gorllewin Cymru.

Bellach, mae wedi codi dros £3,000 ac yn dod â’i thaith i ben yng Ngheinewydd ddydd Sul, sef Dydd Santes Dwynwen.

“O’n i’n un o’r rhai lwcus rili odd wedi gallu gadael y sefyllfa,” meddai wrth Newyddion S4C.

“Fi’n credu o ran profiad fi fy hunan, nes i sort of gweld pa mor unig ma' rhywun yn gallu bod pan ma' nhw mewn sefyllfa o unrhyw fath o gam-driniaeth domestig.

“Neges fi, fi’n credu, i unrhyw un sydd mewn sefyllfa tebyg neu wedi bod mewn sefyllfa tebyg yw, bod nhw ddim ar ben ei hunain, hyd yn oed os ma nhw’n teimlo bod nhw.”