Mae dwy ddynes wedi marw mewn gwrthdrawiad yn y Barri, Bro Morgannwg brynhawn Sadwrn, ac mae dau ddyn wedi eu cludo i'r ysbyty.

Y gred yw fod un o'r dynion mewn cyflwr difrifol.   

Mae'r heddlu'n apelio am wybodaeth wedi'r gwrthdrawiad ar ffordd yr A4050 ger cyffordd Port Road East.

Cafodd y gwasanaethau brys eu galw tua 13.40 wedi adroddiadau fod dau gerbyd wedi taro yn erbyn ei gilydd.  

Dywedodd y Rhingyll Craig Wood: "Mae ein hymchwiliad yn y camau cyntaf, ac ry'n ni'n dal i geisio darganfod yr amgylchiadau yn llawn."  

Mae'r heddlu wedi rhybuddio y bydd y ffordd ar gau tan o leiaf  2.00 fore Sul.