Mae’r ddigrifwraig Albanaidd Janey Godley wedi marw yn yr ysbyty ar ôl derbyn gofal diwedd oes.

Roedd hi'n 63 oed, ac wedi dioddef o ganser yr ofari. 

Mewn neges fideo deimladwy ar gyfryngau cymdeithasol fis Medi, cyhoeddodd y gomediwraig o Glasgow ei bod yn derbyn gofal diwedd oes ar ôl i’w chanser ymledu. 

Mewn datganiad dywedodd ei rheolwr Chris Davies: “Gyda thristwch mawr rydym yn cyhoeddi marwolaeth Janey Godley ar 2 Tachwedd. 

“Bu farw yn heddychlon yn Hosbis Tywysog a Thywysoges Cymru yn Glasgow wedi'i hamgylchynu gan ei hanwyliaid."

Fe ddaeth Ms Godley yn enw cyfarwydd adeg pandemig Covid wrth iddi ddynwared Prif Weinidog yr Alban ar y pryd, Nicola Sturgeon, ar gyfryngau cymdeithasol.

Bydd pawb yn ei chofio am ei “chomedi di-flewyn-ar-dafod, ond yn bennaf oll am fod yn ‘Janey’”, meddai Chris Davies. 

“Bydd colled fawr ar ei hôl gan ei theulu, ffrindiau, a’i holl gefnogwyr.”