Mae Kemi Badenoch wedi ei hethol yn Arweinydd y Blaid Geidwadol.  

Mae hi'n olynu'r cyn Brif Weinidog Rishi Sunak a gyhoeddodd y byddai'n rhoi'r gorau i fod yn arweinydd y blaid, wedi colled drom y blaid yn yr Etholiad Cyffredinol.

Llwyddodd i guro Robert Jenrick gyda 53,806 o bleidleisiau. 

Cafodd ei gwrthwynebydd 41,388 o bleidleisiau. 

A 72.8% o aelodau'r blaid Geidwadol fwrodd eu pleidlais. 

Yn ei haraith wedi iddi gael ei hethol yn arweinydd, dywedodd bod hynny yn "fraint enfawr." 

"Mae'r blaid wedi rhoi gymaint i mi," meddai. 

Wrth ei chyflwyno wedi ei buddugoliaeth, dywedodd Bob Blackman, cadeirydd Pwyllgor 1922 o blith aelodau'r meinciau cefn: "Onid yw hi'n wych i gael menyw arall yn arweinydd y blaid."     

Yn ystod ei haraith, dywedodd Kemi Badenoch ei bod hi eisiau diolch i'w rhagflaenydd Rishi Sunak a'r ymgeiswyr eraill yn y ras am yr arweinyddiaeth. 

Ac ychwanegodd bod angen i'r blaid fod yn onest a chydnabod "i ni wneud camgymeriadau."   

Dywedodd Andrew RT Davies AS, arweinydd y Ceidwadwyr Cymreig ei fod yn edrych ymlaen yn fawr i weithio gyda Kemi Badenoch ac i "ddwyn Llafur i gyfri."  

Dywedodd: “Ar ran y Ceidwadwyr Cymreig, byddem yn hoffi llongyfarch Kemi ar ddod yn arweinydd y blaid, ac rwy'n dymuno'n dda iddi yn arwain yr wrthblaid." 

“Roedd gan y ddau ymgeisydd weledigaeth gadarnhaol ar gyfer ein gwlad, a gan fod yr ornest wedi dod i ben bellach, mae'n amser i ni ddod at ein gilydd a chefnogi Kemi wrth iddi ddwyn y Llywodraeth Lafur ofnadwy hon i gyfri - mae nhw eisoes wedi achosi cymaint o ddifrod i Gymru yn ystod eu cyfnod byr mewn grym yn Llundain, " meddai. 

Wedi proses sydd wedi para bron bedwar mis, fe ymunodd chwe ymgeisydd â'r ras  am yr arwenyddiaeth yn wreiddiol ym mis Gorffennaf. 

Ac wedi sawl pleidlais ymhith aelodau seneddol Ceidwadol, a phedwar ymgeisydd yn colli eu lle - Kemi Badenoch a Robert Jenrick oedd y ddau ar ôl yn y ras.

Wedi hynny, cafodd aelodau'r Blaid Geidwadol gyfle i bleidleisio am eu harweinydd newydd dros gyfnod o 16 o ddiwrnodau.