Mae Manchester United wedi penodi Ruben Amorim yn rheolwr newydd ar gytundeb tan fis Mehefin 2027.

Bydd y rheolwr 39 oed yn gadael ei swydd gyda Sporting Lisbon a chychwyn yn ei rôl newydd ar 11 Tachwedd.

Fe fydd yn cymryd yr awenau wedi i Manchester United ddiswyddo Erik Ten Hag ddydd Llun.

Yn y cyfamser bydd Ruud van Nistelrooy yn parhau fel rheolwr dros dro.

Roedd rhaid i Manchester United dalu £8.3 miliwn er mwyn gweithredu amod yng nghytundeb Ruben Amorim gyda Sporting oedd yn ei alluogi i adael y clwb.

Amorim yw chweched rheolwr parhaol Manchester United ers i Syr Alex Ferguson ymddeol yn 2013.

Llun: Pedro Loureiro/Wochit