Mae teulu menyw oedd yn "mwynhau bywyd" wedi rhoi teyrnged iddi wedi ei marwolaeth mewn gwrthdrawiad yn Sir Gaerfyrddin.

Bu farw Nicola Webb o Beniel mewn gwrthdrawiad gyda char Volkswagen du tra oedd hi ar gefn ei beic modur ar yr A4069 rhwng Llangadog a Llanymddyfri ddydd Sul.

Dywedodd ei theulu y bydden nhw'n ei cholli hi.

"Roedd Nicola yn berson oedd yn mwynhau bywyd a phob dim roedd hi'n gwneud," medde nhw mewn datganiad ddydd Mercher.

"O gerdded gyda'i chŵn neu gyda ffrindiau i reidio beiciau modur.

"Yn drist iawn fe gollodd ei bywyd yn gwneud rhywbeth roedd yn mwynhau'n fawr, reidio ei beic modur i gwrdd â ffrindiau a chael coffi a rol bacwn.

"Bydd ei cholled yn cael ei theimlo gan bawb oedd yn ei adnabod a'i charu."

Ychwanegodd ei theulu eu bod yn diolch i bawb wnaeth geisio achub Nicola ac sydd wedi danfon eu cydymdeimladau atynt.

Mae ymholiadau'r heddlu'n parhau ac maen nhw wedi gofyn i unrhyw un sydd â gwybodaeth a oedd yn teithio ar hyd y ffordd yn ystod amser y gwrthdrawiad neu sydd â lluniau camera dashfwrdd o’r cerbydau i gysylltu gyda nhw.

Llun: Heddlu Dyfed-Powys