Mae Israel wedi targedu safleoedd milwrol Iran mewn ymosodiadau awyr dros nos.

Mae'r cam diweddaraf wedi ei gondemnio gan nifer o wledydd sydd yn gweld y datblygiad fel gweithred beryglus mewn sefyllfa oedd yn fregus yn y rhanbarth yn barod.

Yn ôl Llywodraeth Prydain mae gan Israel yr hawl i amddiffyn ei hun.

Dywedodd byddin Israel, yr IDF, eu bod wedi cynnal y “ymosodiadau manwl” mewn ymateb i’r hyn a elwir yn “ymosodiadau parhaus gan y gyfundrefn yn Iran yn erbyn Israel”.

Dyma'r tro cyntaf i fyddin Israel ymosod yn agored ar Iran.

Dywedoddd llefarydd ar ran byddin Israel: “Yn seiliedig ar gudd-wybodaeth, fe darodd awyrennau’r IAF gyfleusterau gweithgynhyrchu taflegrau a ddefnyddiwyd i gynhyrchu’r taflegrau a daniodd Iran yn erbyn Israel dros y flwyddyn ddiwethaf.

“Roedd y taflegrau hyn yn fygythiad uniongyrchol ar ddinasyddion Talaith Israel.

“Ar yr un pryd, fe darodd yr IDF dargedau yn Iran fyddai’n cyfyngu ar ryddid Israel i weithredu o’r awyr yn Iran.”

Ychwanegodd llefarydd ar ran yr IDF: “Bydd y rhai sy'n bygwth Israel yn talu pris trwm.”

Dywedodd Iran bod yr ymosodiadau o'r awyr wedi targedu canolfannau milwrol yn nhaleithiau Ilam, Khuzestan a Tehran, gan achosi “difrod cyfyngedig”.

Dywedodd byddin Iran yn ddiweddarach bod dau o’i milwyr wedi cael eu lladd yn yr ymosodiadau.

Mewn uwch-gynhadledd y Gymanwlad yn Samoa dywedodd y Prif Weinidog Syr Keir Starmer: “Mae gan Israel yr hawl i amddiffyn ei hun. Rwy’n annog pawb i bwyllo. Ni ddylai Iran ymateb.”

Llun: Wochit