Pa mor aml oeddech chi'n dod yma?

"O'n i'n dod 'ma bob wythnos."

Mae gan Betsan atgofion o ddod i bwll Pontardawe ond caeodd yn Awst.

Roedd yr adeilad yn dangos ei oed ac er y byddai'r cyngor sir yn hoffi codi pwll newydd dydyn nhw ddim yn siwr o ble daw'r arian.

"Wnes i lefain oherwydd mae'n fwy na phwll.

"Mae'n meddwl shwt gyment i'r gymuned.

"Mae plant yn dysgu nofio yma.

"Fel mam i efeilliaid sydd ag awtistiaeth yr unig le cynhwysol i fynd a'r plant, rhywle'n hollol gartrefol helpu pobl oedd yn cael strokes a neud rehab.

"Fi ffaelu credu bod e 'di caead."

Byddai pwll newydd yn costio £10 miliwn o leia yn ôl Cyngor Castell-nedd Port Talbot.

Mae gwasanaethau eraill y mae'n rhaid i gynghorau dalu amdanyn nhw.

Bellach mae arweinyddion Plaid Cymru wedi ysgrifennu at y Canghellor gan rybuddio bod y cynghorau ar ymyl y dibyn o achos prinder arian.

"Dyw'r system ddim yn gweithio.

"Mae gyment o wasanaethau dan bwysau aruthrol a chynnydd yn y galw gyda plant a'r henoed.

"Mae 'na bwysau aruthrol ar ysgolion ar draws Cymru.

"Nifer o ysgolion mewn dyled a methu'n deg a talu ffordd.

"Mae'n hewlydd ni mewn picl ar draws y wlad ac mae'n rhaid gweld newid.

"Mae'n rhaid cael arian i gefnogi'r gwasanaethau 'ma."

Faint o arian dach chi'n meddwl mae'r cynghorau angen?

"Mae'r Gymdeithas Llywodraeth Leol yn amcangyfrif dros £500 miliwn o gostau ychwanegol ar draws Cymru ar gyfer y flwyddyn ariannol nesa."

Wrth i Gyngor Gwynedd orwario eleni mae'r prif weithredwr yn awgrymu dod a rhai gwasanaethau i ben neu godi treth y cyngor hyd at 16%.

Mae Llywodraeth Prydain yn addo cydweithio a Llywodraeth Cymru i sicrhau'r cyllid gorau posib i'r cynghorau.

Mae hwn yn faes sydd wedi ei ddatganoli.

Mae Plaid Cymru wedi anfon llythyr at Brif Weinidog Cymru hefyd.

"Ni'n wahanol i Loegr 'di rhoi arian ychwanegol i lywodraeth leol dros nifer o flynyddoedd dyna pam chi heb weld nhw'n mynd i'r wal.

"Maen nhw dan bwysau aruthrol ac wrth gwrs ni'n dechre trafod ein cyllid ni ar gyfer y flwyddyn nesaf hefyd."

Gallai'r sefyllfa fod rhyw faint cliriach yr wythnos nesaf er rhybudd y Canghellor bod arian yn brin.

Bydd cynghorau Cymru'n gobeithio y daw rhyw faint i'w cyfeiriad nhw.