Mae dyn o Wynedd wedi ei garcharu ar ôl cyfaddef iddo stelcian cyn-bartner iddo a bygwth datgelu lluniau o natur rywiol o ddynes arall.

Ddydd Gwener, fe gafodd Gruffydd Llŷr Williams, 44 oed, o Efailnewydd ger Pwllheli ddedfryd o 27 mis yn y carchar mewn gwrandawiad yn Llys y Goron Caernarfon, oedd yn eistedd yn Llandudno.

Roedd Williams, oedd wedi gweithio fel syrfëwr meintiau, wedi gyrru e-bost at fos y ddynes, a chyfeirir ati hi fel Dioddefwr A yn y llys, i ddweud nad oedd hi'n yn “foesol ffit” i fod â swydd yn y gweithle.

Roedd hefyd wedi postio lluniau ohoni hi a rhoi sylwadau sarhaus amdani ar y cyfryngau cymdeithasol, yn ogystal â chysylltu â phapur newydd rhanbarthol i’w hannog i gyhoeddi stori amdani.

Dywedodd Paulinis Barnes, ar ran yr erlyniad, fod y dioddefwr wedi byw mewn “cyflwr cyson o banig”. Roedd wedi symud tŷ a gosod camerau cylch cyfyng.

Roedd gweithle’r ddynes wedi rhoi ‘larwm trais rhywiol’ iddi hi.

“Rwy’n ofni’r hyn y gall y dyn hwn ei wneud i mi,” dywedodd y fenyw mewn datganiad effaith.

'Cam-drin'

Fe wnaeth Gruffydd Llŷr Williams hefyd gyfaddef iddo stelcian gan frawychu’n ddifriol ar ôl iddo fygwth datgelu lluniau o natur rywiol o ail ddynes.

Cafodd gorchymyn atal 15 mlynedd ei roi gan y barnwr, Nicola Saffman.

Dywedodd y Barnwr Saffman am y stelcian: “Roedd yn weithred barhaus gyda’r bwriad o achosi’r trallod mwyaf. Mae hwn yn achos tebyg i gam-drin domestig.”

Mynnodd bargyfreithiwr yr amddiffyniad Richard Edwards nad oedd Williams wedi bod yn “beio’r dioddefwr” mewn adroddiad cyn-dedfrydu.

Roedd wedi gweithio ym maes adeiladu a pheirianneg ac yn fwy diweddar gyda’r Ymddiriedolaeth Genedlaethol. 

Dywedodd yr amddiffyniad fod Williams wedi cael ei wawdio oherwydd problem feddygol a bod ganddo feddyliau hunanladdol.