Mae’r heddlu wedi cyhoeddi lluniau newydd o fenyw o Bontypridd sydd wedi bod ar goll am bedwar diwrnod.

Cafodd Joanne Jones, 49 oed, ei gweld ddiwethaf tua 9.45 ddydd Llun, 21 Hydref, yng Ngerddi’r Fro ym Mhontypridd, ond does neb wedi clywed ganddi ers hynny.

Y gred yw ei bod hi wedi anelu am Heol Graigwen yng nghyfeiriad Coedwig Llanwynno.

Image

Mae lluniau newydd o gamerau cylch cyfyng yn ei dangos yn gwisgo cot werdd dywyll, bag du, legins, ac esgidiau cerdded.

Mae swyddogion sydd â hyfforddiant chwilio ac offer arbenigol wedi dechrau chwilio, gan gynnwys edrych yn yr ardaloedd coedwig yn agos i le cafodd hi ei gweld ddiwethaf.

Fel rhan o’r chwilio, mae Gwasanaeth Awyr Cenedlaethol yr Heddlu wedi cael ei ddefnyddio, yn ogystal â gwirfoddolwyr a cŵn chwilio.

Yn ôl Prif Arolygydd Heddlu De Cymru, Matt Rowlands: “Rydyn ni’n cadw meddwl agored am beth ddigwyddodd i Joanne ac yn parhau i wneud ymholiadau eang.

"Rydyn ni’n awyddus i glywed gan unrhywun sydd â deunydd fideo dash-cam neu flaen y drws yn ardaloedd Graigwen, Llanwynno, Perthcelyn, ac Ynysybwl o 9.30 fore Llun hyd heddiw.

"Rwy’n deall pa mor bryderus yw’r sefyllfa hon i deulu a ffrindiau Joanne, ac rydyn ni’n gwerthfawrogi’r gefnogaeth barhaol gan y gymuned leol.”