Mae dyn wedi cael ei arestio mewn maes awyr yn dilyn golygfeydd treisgar ar ôl gêm bêl-droed yng Nghaerdydd. 

Yn ôl yr heddlu, cafodd dyn 19 oed o ardal Llanrhymni yn y brifddinas ei arestio ym Maes Awyr Bryste ddydd Llun.

Mae'n cael ei hebrwng yn ôl i Gaerdydd er mwyn i'r heddlu ei holi.  

Cafodd dau ddyn arall eu cyhuddo yn flaenorol, wedi ymosodiad honedig y tu allan i Ganolfan Hamdden y Dwyrain yn Llanrhymni yn gynharach y mis hwn. 

Bu'n rhaid i un o'r dynion a gafodd eu hanafu, Joel Collins, 32, gael llawdriniaeth i'w ben-glin wedi'r digwyddiad. 

Roedd tîm Mr Collins Avenue Hotspur FC – o ardal Trelái yng Nghaerdydd – newydd golli 3-1 yn erbyn Llanrumney Athletic yn y ganolfan hamdden cyn i'r gwrthdaro honedig ddechrau.

Dywedodd tystion wrth y BBC fod grŵp wedi ymosod ar rai o chwaraewyr Avenue Hotspur wrth iddyn nhw adael yr ystafell newid, gan ddefnyddio amrywiol arfau yn cynnwys bat pêl-fas. 

Mae dyn 19 oed yn dal i fod yn y ddalfa wrth i'r ymchwiliad barhau.

Mae dau ddyn -  Benjamin Dean, 28, o Trowbridge, a Ryan Rees, 22, o Lanrhymni – wedi eu cyhuddo mewn cysylltiad â'r digwyddiad. 

Mae'r ddau wedi eu cadw yn y ddalfa, ar ôl iddyn nhw ymddangos yn Llys Ynadon Caerdydd ar 16 Hydref.  

Llun: Google