Parhau mae'r rhybuddion tywydd melyn ar gyfer canolbarth a de Cymru ddydd Mawrth wrth i Storm Chandra daro'r wlad.

Fe ddaeth rhybudd melyn am wynt ar gyfer y de orllewin i rym am 05:00 fore Mawrth.

Bydd y rhybudd yn parhau tan 16.00 ac yn effeithio ar siroedd Abertawe, Ceredigion, Sir Benfro a Sir Gâr.

Dywedodd y Swyddfa Dywydd y bydd Storm Chandra yn dod â gwyntoedd cryfion i'r ardaloedd yma yn ystod fore Mawrth.

"Bydd hyrddiau o 50-60 mya ar y tir a 60-70 mya ar hyd arfordiroedd agored," meddai llefarydd. 

"Mae'n bosibl y bydd hyrddiadau hyd at 80 mya ar gyfer rhannau o Sir Benfro. 

"Dylai'r gwyntoedd ostegu'n raddol yn ddiweddarach yn y prynhawn."

Fe gaeodd Pont Cleddau yn Sir Benfro i gerbydau ochrau uchel fore Mawrth oherwydd gwyntoedd cryfion.

Ail rybudd

Bydd rhybudd melyn am law hefyd mewn grym tan 10.00 ddydd Mawrth.

Fe ddaeth y rhybudd i rym am 13:00 brynhawn Llun.

Fe allai rhwng 20-30mm o law ddisgyn ac mae rhwng 50-80mm yn bosib ar dir uwch, gan gynnwys Bannau Brycheiniog. 

Dywedodd llefarydd ar ran y Swyddfa Dywydd y gallai'r amodau achosi llifogydd mewn rhai cartrefi a busnesau, a chreu trafferthion i deithwyr.

Fe allai rhai gwasanaethau trên a bws gael eu hoedi neu eu canslo hefyd yn ôl y Swyddfa Dywydd.

Bydd y rhybudd yn effeithio ar y siroedd canlynol: Blaenau Gwent; Caerffili; Sir Gâr; Merthyr Tudful; Castell-nedd Port Talbot; Sir Benfro; Rhondda Cynon Taf; Torfaen; Pen-y-bont ar Ogwr; Caerdydd; Ceredigion; Sir Fynwy; Casnewydd; Powys; Abertawe; Bro Morgannwg.