Mae drôn wedi cael ei lansio tuag at dŷ Prif Weinidog Israel ger Tel Aviv, meddai ei lefarydd.

Doedd Benjamin Netanyahu na’i wraig Sara ddim yn y lleoliad ar y pryd, ac ni chafodd neb eu hanafu.

Dywedodd Byddin Israel bod tri drôn wedi’u lansio o Libanus i Israel yn gynnar fore Sadwrn, gydag un yn taro adeilad yn Caesarea.

Nid yw Llywodraeth Israel wedi dweud a oedd yr adeilad yn rhan o gartref ei Phrif Weinidog.

Daw wrth i Israel barhau i ymosod ar dargedau yn Libanus sydd, meddai, yn gysylltiedig â’r grŵp Hezbollah.

Mae dwsinau o bobl wedi’u lladd mewn streiciau awyr gan Israel ar draws Libanus a Gaza dros y 24 awr ddiwethaf, yn ôl adroddiadau. 

Mae o leiaf 21 o bobol wedi’u lladd yn Gaza mewn streiciau fore Sadwrn, gyda newyddiadurwyr o’r Associated Press yn cyfri cyrff 10 o bobol yn Zawayda, ac 11 arall yng ngwersyll ffoaduriaid Maghazi.

Cafodd o leiaf dau berson eu lladd yn Libanus fore Sadwrn pan gafodd car ei dargedu gan streic i’r gogledd o Beirut, yn ôl gweinidogaeth iechyd Libanus. 

Daw wedi i 33 o bobol gael eu lladd yn Jabalia neithiwr, ar ôl i streic awyr gan Israel daro gwersyll ffoaduriaid, yn ôl asiantaeth newyddion WAFA Palestina.

Llun: Amir Levy / Getty Images