Mae Undeb Amaethwyr Cymru wedi cyhoeddi’r lluniau buddugol fydd yn ymddangos yn ei galendr ar gyfer 2025. 

Mae'r delweddau yn "cyfleu bywyd gwledig o bob cwr o Gymru", yn ôl yr undeb. 

Emily Jones o bentref Penuwch yng Ngheredigion oedd prif enillydd y gystadleuaeth gyda’i llun o ddefaid Cheviot Tiroedd y Gogledd o dan flagur coed yn dod i’r brig.

Bydd ei llun yn ymddangos ar glawr y calendr ac mi fydd Ms Jones yn derbyn gwobr o £250 ar ddiwrnod cyntaf Ffair Aeaf Frenhinol Cymru ym mis Tachwedd. 

Ymhlith y ffotograffwyr buddugol eraill y mae: Greta Hughes o Ben-Llŷn, Jamie Smart o Gwm Elan, Heledd Williams o Lanrwst, Annie Fairclough o Bowys, Chloe Bayliss o’r Fenni, Steven Evans Hughes o Groesoswallt yn Sir Amwythig, Marian Pyrs Owen o Gerrigydrudion, Beca Williams o Fôn, Richard Walliker o Sir Ddinbych, Erin Wynne Roberts o Gonwy ac Anne Callan o’r Hwlffordd. 

Dyma ddetholiad o’u gwaith: 

Image

Image

Image

Image

Image

Image

Image

Image

Image

Image

Image

'Y gorau o Gymru'

Dywedodd Llywydd Undeb Amaethwyr Cymru, Ian Rickman: “Mae’r gystadleuaeth wedi bod yn hynod boblogaidd eto eleni ac roeddwn wrth fy modd yn edrych trwy dros 100 o ddelweddau gwledig bendigedig. Roedd y safon yn uchel ac nid oedd yn dasg o ddewis deuddeg yn un rhwydd.

“Rwy’n meddwl ein bod ni wedi cyfleu’r gorau sydd gan Gymru wledig i’w chynnig, o asynnod a moch bach ciwt, buwch yr Ucheldir ar gyfer mis Mawrth, delwedd yn dangos manylder agos o wyneb ysgyfarnog ar ddechrau’r flwyddyn i fachlud pinc yng nghefn gwlad Cymru.

“Mae’r gystadleuaeth hon wedi amlygu bod ffermio yn bwysig i bob un ohonom mewn rhyw ffordd neu’i gilydd," meddai.

Bydd y calendrau ar gael o swyddfeydd sir leol ac o stondin Undeb Amaethwyr Cymru yn Ffair Aeaf Frenhinol Cymru.