Mae Dyfrig Siencyn wedi ymddiswyddo fel arweinydd Grŵp Cynghorwyr Plaid Cymru Gwynedd, gan arwain at ansicrwydd sylweddol am ei rôl ehangach fel arweinydd y cyngor.

Mae Mr Siencyn yn arweinydd ar Gyngor Gwynedd ers 2017, ac fe fydd ei ymddiswyddiad fel arweinydd Grŵp Cynghorwyr y blaid yn y sir yn codi cwestiwn am ei ddyfodol yn y rôl honno, gan fod arweinydd y brif blaid hefyd yn arweinydd ar y cyngor llawn.

Daw ei ymddiswyddiad wedi beirniadaeth ymysg cynghorwyr o'i ymateb i achos Neil Foden wedi iddo wrthod ymddiheuro yn wreiddiol i ddioddefwyr y pedoffeil, yn dilyn darlledu rhaglen deledu ddiweddar am yr achos.

Ym mis Gorffennaf, fe gafodd Neil Foden ei garcharu am 17 mlynedd am gam-drin pedair o ferched yn eu harddegau yn rhywiol.

Mewn datganiad fore Iau, dywedodd Cadeirydd Grŵp Cynghorwyr Plaid Cymru Gwynedd, Cai Larsen, fod Mr Siencyn wedi cynnig ei ymddiswyddiad nos Fercher, a bod aelodau'r grŵp wedi ei dderbyn: 

"Yn dilyn trafodaethau yng nghyfarfod Grŵp Cynghorwyr Plaid Cymru Gwynedd ddoe cynigiodd arweinydd y Grŵp, y Cynghorydd Dyfrig Siencyn, ei ymddiswyddiad i’r aelodau. Derbyniwyd ei ymddiswyddiad.

“Hoffai holl aelodau’r Grŵp ddiolch o waelod calon i’r Cynghorydd Dyfrig Siencyn am ei waith a’i ymroddiad fel arweinydd dros y saith mlynedd ddiwethaf. Dymunwn yn dda iddo i’r dyfodol.

“Bydd ethol arweinydd newydd i’r Grŵp yn digwydd, maes o law, yn unol â’n trefn a phrosesau arferol.”

Roedd pedwar aelod o gabinet Cyngor Gwynedd wedi ymddiswyddo o'r cabinet ddydd Iau diwethaf oherwydd eu hanhapusrwydd gyda'r modd yr oedd arweinyddiaeth y cyngor wedi ymdrin ag achos Neil Foden.

Mewn datganiad dywedodd y cynghorwyr Beca Brown, Berwyn Parry Jones, Dafydd Meurig ac Elin Walker Jones eu bod nhw’n camu i lawr oherwydd gwahaniaeth barn gydag arweinyddiaeth y cyngor.

Ddiwrnod yn ddiweddarach fe wnaeth Mr ap Siencyn ymddiheuro i ddioddefwyr Neil Foden.

Roedd wedi dod dan bwysau gan arweinydd Plaid Cymru, Rhun ap Iorwerth, oedd wedi dweud bod angen iddo “feddwl eto” am ymddiheuro, cyn iddo wneud hynny.