Bydd Pwyllgor Argyfyngau Brys (DEC) Cymru yn lansio Apêl Ddyngarol y Dwyrain Canol ddydd Iau.

 

Dywedodd DEC Cymru bod miliynau o bobl ledled Gaza, Libanus a'r rhanbarth ehangach angen bwyd, lloches a gofal meddygol. 

 

Mae DEC yn dod â 15 o elusennau cymorth at ei gilydd ar adegau o argyfwng lle mae angen dyngarol sylweddol. 

 

Mae 14 o elusennau sy’n aelodau o DEC yn Gaza a Libanus ar hyn o bryd, gydag wyth ar y Lan Orllewinol.

 

Mae'r elusennau'n cynnwys Oxfam, Achub y Plant a'r Groes Goch Brydeinig.

 

 

 

Dywedodd Saleh Saeed, prif weithredwr DEC, bod cefnogaeth yr elusennau yn “achubiaeth hanfodol” i filiynau o bobl.

 

“Mae elusennau sy’n aelodau o DEC yn ymateb ar hyn o bryd yn Gaza, Libanus a’r Llain Orllewinol, gan ddarparu bwyd, dŵr, lloches a meddyginiaeth sy’n achub bywydau – mae’r gefnogaeth ddyngarol hon yn achubiaeth hanfodol i filiynau o bobl sydd angen cymorth dirfawr.

 

“Ond mae ein haelod elusennau angen mwy o arian ar frys i ateb yr angen dirfawr allan yna.” 

 

Mae Rachael Cummings, cyfarwyddwr dyngarol Achub y Plant, newydd ddychwelyd o Gaza.

 

Dywedodd eu bod yn gweld “trychineb dyngarol ar lefel hollol newydd”.

 

  

“Mae iechyd pobl yn dirywio ar raddfa ryfeddol. Mae cymunedau oedd yn iach yn y gorffennol yn diflannu. Rydym yn gweld cynnydd yn nifer y plant â dolur rhydd, clefyd melyn, cyflyrau anadlu – afiechydon, o’u cyfuno â newyn eithafol, all ladd plentyn mewn dyddiau.”  

 

Ychwanegodd: “Rydym yn gwneud popeth o fewn ein gallu i ymateb i anghenion plant ac yn annog y cyhoedd yn y DU i gyfrannu at apêl DEC, fel ein bod yn gallu darparu’r cymorth hanfodol y mae plant a’u teuluoedd, sydd wedi byw trwy’r gwrthdaro creulon hwn, mor daer ei angen.”