Cuddio dyn eira aur mewn calendr adfent
14/10/2024
Bydd cymeriad hoffus Y Dyn Eira yn ymddangos ar ddarn 50 ceiniog y Bathdy Brenhinol, a bydd fersiwn aur wedi ei guddio mewn un o'u calendr adfent eleni.
Yn ffenestr Noswyl Nadolig y bydd y darn gwerthfawr wedi ei guddio.
£30 fydd y pris am y calendr adfent gyda chyfanswm o 3,000 ar gael, ac un yn unig fydd â'r darn aur.
Mae'r darnau 50c eraill ar gael mewn amrywiol liwiau eraill, gyda'r prisiau rhataf yn £12.
Fyddan nhw ddim ar gael i'w gwario mewn siopau.
Mae'r darn 50c newydd yn dathlu llyfr Raymond Briggs, ac mae'r llun ar gefn y darn arian yn dangos y dyn eira yn addurno coeden Nadolig.
Ymddangosodd Y Dyn Eira ar ddarnau 50c y Bathdy Brenhinol am y tro cyntaf yn 2018. Mae bron 700,000 ohonyn nhw wedi eu dosbarthu i 75 o wledydd, yn ôl y sefydliad o Lantrisant, Rhondda Cynon Taf.
Cafodd The Snowman, Raymond Briggs ei gyhoeddi gyntaf yn 1978, fel llyfr lluniau heb ysgrifen. Ers hynny mae wedi gwerthu 5.5 miliwn o gopïau ar hyd a lled y byd.
Cafodd fersiwn Gymraeg Y Dyn Eira ei chyhoeddi gan Wasg y Dref Wen yn 1998.
O 11 Tachwedd, bydd modd prynu darn 50c Y Dyn Eira yn ystod sesiynau Profiad y Bathdy Brenhinol yn eu canolfan yn Llantrisant.
