Mae cannoedd o filoedd o bobl yn nhalaith Florida yn yr UDA wedi ffoi o'u cartrefi wrth i gorwynt nerthol Milton agosáu.

Mae'r awdurdodau yn y wlad wedi amcangyfrif y gallai'r corwynt Graddfa 4 achosi gwerth $1 biliwn o ddoleri o ddifrod.

Dywedodd yr Arlywydd Joe Biden y gallai'r corwynt fod y gwaethaf i daro Florida mewn canrif:

“Rydw i wedi cael fy mriffio gan uwch arweinwyr y weinyddiaeth hon, ac rydyn ni’n cynyddu parodrwydd ar gyfer Corwynt Milton, a allai fod yn un o’r stormydd gwaethaf mewn 100 mlynedd yn Florida,” meddai Biden o’r Tŷ Gwyn.

“Os ydych chi o dan orchmynion i symud, dylech symud nawr, nawr, nawr. Dylech fod wedi symud eisoes. Mae’n fater o fywyd a marwolaeth ac nid yw hynny’n ormodiaith, ”meddai yn ystod diweddariad ar Gorwynt Milton ddydd Mawrth.

Mae'r Arlywydd Biden wedi gohirio taith i'r Almaen ac Angola er mwyn goruchwylio paratoadau ar gyfer y storm yn ogystal â'r ymateb presennol i Gorwynt Helene. 

Cafodd bron i 700 o hediadau eu canslo erbyn brynhawn Mawrth, gyda 1,500 o'r hediadau sydd wedi eu trefnu ar gyfer ddydd Mercher hefyd yn cael eu canslo.

Mae disgwyl i'r corwynt daro'r tir mawr nos Fercher (amser lleol), gyda rhagolygon yn darogan y gallai greu gwyntoedd o 150 milltir yr awr.

Mae maer Clearwater yn y dalaith wedi rhybuddio pobl yno i adael ar frys cyn i'r corwynt gyrraedd.

Dywedodd Bruce Rector y gallai pobl sydd yn dewis aros yn yr ardal farw o ganlyniad i'r storm.