Arestio protestwyr yn Llundain wrth i filoedd ymgynnull dros hawliau Palesteiniaid
Mae protestwyr wedi eu harestio wrth i ddegau ar filoedd o bobl ymuno â phrotest yng nghanol Llundain dros hawliau Palesteiniaid.
Cafodd y brotest ei threfnu bron flwyddyn ers ymosodiadau 7 Hydref yn Israel.
Mae 17 o bobl wedi eu harestio yn ôl Heddlu'r Met.
Cafodd un person ei arestio ar amheuaeth o gefnogi sefydliad sydd wedi ei wahardd.
Mae saith o bobl wedi eu harestio ar amheuaeth o gyflawni troseddau yn erbyn y drefn gyhoeddus, gyda thri yn ymwneud â chymhelliad hiliol honedig.
Mae tri o bobl wedi eu harestio ar amheuaeth o ymosod ar weithiwr argyfwng, a thri arall ar amheuaeth o ymosod.
Dywedodd y llu bod rhai ohonyn nhw wedi eu harestio, wrth i bobl geisio mynd heibio plismyn a oedd wedi gosod rhwystrau er mwyn atal grwpiau rhag gwahanu o'r brif brotest.
Fe ddaeth y protestwyr ynghyd fore Sadwrn yn Bedford Square, gyda nifer fawr o blismyn yn bresennol.
Yn ôl trefnwyr y brotest, y bwriad yw "targedu" cwmniau a sefydliadau sydd yn "gysylltiedig â throseddau Israel" sy'n cynnwys Banc Barclays a'r Amgueddfa Brydeinig, medden nhw.
Ymgasglodd nifer y tu allan i gangen Barclays yn Tottenham Court Road am gyfnod cyn teithio draw i'r Amgueddfa Brydeinig.
Yn Bedford Square, roedd rhai yn cario baneri Libanus ac Iran gyda nifer yn gweiddi "Rhyddid i Balesteina".
