Mae llys wedi clywed bod merch wedi gweiddi ‘mi wna i dy f****ng ladd di’ fwy nag unwaith wrth ymosod ar athrawon a disgybl yn Ysgol Dyffryn Aman.

Daw wrth i achos llys y ferch 14 sydd wedi ei chyhuddo o drywanu dwy athrawes yn Ysgol Dyffryn Aman ddechrau yn Llys y Goron Abertawe Llun.

Nid oes modd cyhoeddi ei henw o achos ei hoedran.

Mae’r ferch yn gwadu tri chyhuddiad o geisio llofruddio.

Plediodd yn euog i’r cyhuddiadau llai o glwyfo gyda’r bwriad o achosi niwed corfforol difrifol mewn gwrandawiad fis diwethaf.

Clywodd y llys bod yr athrawon Fiona Elias a Liz Hopkin a disgybl wedi eu hanafu yn y digwyddiad ar 24 Ebrill.

Ddydd Llun amlinellodd William Hughes KC yr achos yn erbyn y ferch.

Dywedodd bod y digwyddiadau wedi eu gweld gan nifer o aelodau o staff a disgyblion, ac wedi eu dal ar gamera cylch cyfyng a ffonau symudol.

Roedd y ferch wedi edrych ar Fiona Elias gyda golwg “sinistr” yn ei llygaid cyn i’r ferch ofyn “Hoffech chi weld beth sydd yn fy mhoced?” meddai.

Gwyliodd y rheithgor fideo o’r ymosodiad cychwynnol, a’r ymosodiad ar y disgybl rai munudau yn ddiweddarach.

Fe ddywedodd y ferch “mi wna i dy f***ng ladd di” cyn ymosod ar Fiona Elias ac yna eto'r disgybl, meddai’r erlyniad.

Wrth gael ei chludo i orsaf yr heddlu yn Llanelli gofynnodd: ‘Ydyn nhw wedi marw?’

Ychwanegodd: "Dw i'n eitha' sicr y bydd hyn ar y newyddion. Felly bydd mwy o lygaid yn edrych arna i. Dyna un ffordd i fod yn enwog.”

Image

Yn ddiweddarach daeth yr heddlu o hyd i lyfrau nodiadau oedd yn cynnwys enwau'r disgybl a Fiona Elias, lluniau a iaith dreisgar.

Dywedodd William Hughes KC fod y ferch yn "amlwg ddim yn hoffi" y ferch ysgol arall na chwaith Fiona Elias "o ystyried cynnwys y darluniau a’r geiriau cysylltiedig".

Dywedodd yr erlynydd mai Ms Hopkin oedd wedi ei hanafu waethaf. Bu'n rhaid iddi gael ei hedfan i Gaerdydd lle cafodd driniaeth am glwyfau trywanu i'w phen-glin, rhan isaf ei choes, ei brest ac o dan lafn ei hysgwydd. Roedd y clwyf gwaethaf i'w gwddf.

Aed â Mrs Elias a'r ferch yn ei harddegau i'r ysbyty yn Abertawe, ac fe wnaethon nhw hefyd dderbyn triniaeth am glwyfau trywanu.

Ymddangosodd y ferch, oedd yn gwisgo crys gwyn, gwasgod ddu a thei du, gan eistedd yn y llys yn hytrach na’r doc.

Bydd yr achos llys yn parhau ddydd Mercher, a mae disgwyl iddo barhau hyd nes diwedd yr wythnos nesaf.

Roedd William Hughes KC a Helen Randall yn cynrychioli’r erlyniad, a Caroline Rees KC gan ymddangos yn rhithiol a James Hartson yn cynrychioli’r  amddiffyniad.