Mae Hezbollah wedi cadarnhau marwolaeth eu harweinydd Hassan Nasrallah wedi i Israel ymosod ar Beirut. 

Nid oedd Nasrallah wedi cael ei weld yn gyhoeddus am flynyddoedd, a hynny wedi pryderon y byddai'n cael ei ladd gan Israel. 

Roedd yn un o'r ffigyrau mwyaf adnabyddus yn y Dwyrain Canol. 

Mae Israel wedi bod yn ymosod yn gyson ar Lebanon yn yr wythnosau diwethaf, gan dargedu'r Brifddinas Beirut gyda nifer o ymosodiadau ar 'bencadlys' Hezbollah.

Mewn datganiad, dywedodd Lluoedd Amddiffyn Israel: "Ni fydd modd i Hassan Nasrallah barhau i achosi terfysg yn y byd."

Fe wnaeth Hezbollah addo i barhau yn eu brwydr yn erbyn Israel wedi'r farwolaeth, ac mae Iran wedi bygwth dial am yr ymosodiad hefyd.

Fe fydd y datblygiad diweddaraf yn cynyddu'r tensiynau yn y rhanbarth wedi i wasanaethau cudd Israel gynnal ymgyrch i ymosod yn uniongyrchol ar swyddogion Hezbollah yn Lebanon drwy ffrwydro dyfeisiadau cudd.

Ddydd Gwener, dywedodd swyddogion yn Lebanon fod chwech o bobl wedi eu lladd a 91 wedi eu hanafu mewn ymosodiad awyr, gyda swyddogion lleol yn dweud fod bron i 800 o bobl wedi eu lladd yn sgil ymosodiadau gan Israel yn Lebanon ers dydd Llun.