Mae Reform UK wedi dewis cyn-bennaeth cyfathrebu fel ei ymgeisydd ar gyfer is-etholiad Caerffili.

Mae Llŷr Powell wedi cael ei ddewis i ymgeisio dros y blaid yn yr is-etholiad ar 23 Hydref.

Roedd Mr Powell yn gweithio'n flaenorol fel arbenigwr cyfathrebu i'r blaid yng Nghymru.

Daw'r is-etholiad yn dilyn marwolaeth yr AS Llafur Hefin David, a oedd wedi gwasanaethu fel aelod o'r Senedd dros Gaerffili ers 2016.

Mae Plaid Cymru wedi dewis cyn-arweinydd Cyngor Caerffili, Lindsay Whittle, fel eu hymgeisydd ar gyfer yr is-etholiad.

Gareth Potter sydd wedi ei ddewis gan y Ceidwadwyr Cymreig fel eu hymgeisydd.

Mae'r Democratiaid Rhyddfrydol a Gwlad wedi dweud hefyd y bydd y ddwy blaid yn ymladd yr is-etholiad.

Wrth siarad yng nghynhadledd i'r wasg Reform yng Nghaerffili ddydd Gwener, dywedodd Nigel Farage ei fod wedi cael “wythnos ddrud iawn” yn ceisio cyngor gan arbenigwyr treth.

Dywedodd arweinydd Reform UK y llynedd ei fod wedi prynu cartref yn ei etholaeth yn Essex, ond fe ddaeth yn amlwg yn ddiweddarach mai ei bartner oedd wedi prynu'r eiddo.

Eglurder

Dywedodd Mr Farage mai ei bartner Laure Ferrari yw unig berchennog y tŷ yn Clacton ond ei fod wedi wynebu galwadau i egluro'r sefyllfa yn dilyn awgrymiadau y gallai fod wedi strwythuro'r pryniant er mwyn osgoi talu treth ychwanegol.

Dywedodd: “Yr arian oedd yn eiddo iddi yn gyfreithiol, fe brynodd hi'r tŷ. Nid oes gennyf unrhyw fudd ariannol ynddo o gwbl - heblaw ei bod hi'n gadael i mi aros yno.”

Dywedodd Mr Farage wrth newyddiadurwyr ei fod wedi cael cyngor arbenigwr treth am y sefyllfa.

“Rwyf wedi talu llawer o arian i wneud yn siŵr ein bod wedi gwneud popeth yn iawn,” meddai.

Ychwanegodd yr AS ei fod yn “bryderus iawn” bod rhai adroddiadau yn y cyfryngau yn “dechrau crwydro” i “diriogaeth enllib”.

Ychwanegodd: “Rwyf wedi gwneud popeth o fewn fy ngallu i brofi bod popeth rwyf wedi’i wneud yn gyfreithlon ac yn gywir.”