Mae un o ffotograffwyr mwyaf dylanwadol Prydain wedi bod yn edrych yn ôl ar ei yrfa hir a llwyddiannus, yn datgelu sut mae’n tynnu’r llun perffaith.

Mae David Hurn, 90, wedi tynnu lluniau o fandiau enfawr fel The Beatles, ac wedi dal eiliadau hanesyddol, fel angladd Winston Churchill a thrychineb Aberfan.

Dywedodd David Hurn: “Mae ffotograffiaeth yn syml iawn – rydych chi’n dechrau yn y lle iawn, pwyso’r  botwm ar yr amser iawn, ac mae gennych chi lun.

“Mae, mewn theori, mor syml â hynny. Ond mae'n rhaid i chi fod yn y lle iawn.

“Yna mae'n rhaid i chi arsylwi ar yr hyn sy'n digwydd... ac ar ôl amser rydych chi'n ei godi'n reddfol.”

Image

Dywedodd David bod ei ddidordeb mewn ffotograffiaeth wedi dechrau’n gyntaf pan oedd yn y fyddin.

“Gwelais lun yng nghylchgrawn o’r enw Picture Post, o swyddog o fyddin Rwsia yn prynu het i’w wraig mewn siop adrannol ym Moscow,” meddai.

“Fe wnaeth i mi grio, oherwydd roedd fy nhad wedi bod i ffwrdd yn ystod yr Ail Ryfel Byd, a’r peth cyntaf wnaeth o pan ddychwelodd i’r DU oedd mynd â mam i Howells [siop adrannol] yng Nghaerdydd, a phrynu het iddi.

“Gwelais yn sydyn y gallai ffotograff greu emosiwn enfawr, ond gallai hefyd wrthweithio propaganda.”

Image

Yn 1964, tynnodd rai o'i luniau mwyaf eiconig gyda’r Beatles.

Gofynnwyd iddo dynnu llun o’r band wrth iddyn nhw ffilmio A Hard Day’s Night, a dywedodd wrth y cyfarwyddwr: “Ar yr amod nad oes rhaid i mi byth ofyn iddyn nhw [y band] wneud dim byd.

“Doedd dim pwynt gwneud y llun gosod hwnnw, oherwydd fe fyddai 400 o ffotograffwyr eraill drwy’r amser yn saethu’r un llun.”

Ar y pryd, roedd yn bwysig i David “geisio darganfod, yn weledol, y cysylltiad hwnnw rhwng y cefnogwyr a’r Beatles”.

“Fe wnes i eu cael nhw, yn amlwg, yn anhygoel o dalentog,” meddai.

“Roeddwn i’n synnu pa mor benderfynol oedden nhw i wneud yr hyn roedden nhw eisiau ei wneud – oedd yn dda oherwydd fe wnes i fwynhau hynny.”

Image

Ond nid dyma oedd tro olaf David i ymateb i sêr mawr trwy gydio yn ei gamera.

Llwyddodd hefyd i ddal y ‘buzz’ o amgylch cyngerdd Taylor Swift yng Nghaerdydd yn gynharach eleni.

“Fe ddigwyddodd oherwydd fy mod i mewn oedran lle rydw i’n gwneud pethau gwirion bron allan o sbeit,” meddai.

“Darllenais fod Taylor Swift wedi dod ag £1biliwn i mewn i’r economi… a meddyliais, ‘wel, dwi ddim eisiau tynnu llun ohoni, ac yn sicr dydw i ddim eisiau mynd i’r cyngerdd’.

“Ond roeddwn i’n meddwl y byddai’n hwyl tynnu lluniau o’r cefnogwyr.”

'Pererindod grefyddol'

Er i filoedd o Swifties wneud eu ffordd i Stadiwm Principality ym mis Mehefin eleni, roedden nhw ymhell o fod yn stwrllyd, yn ôl David.

“Roeddech chi yno gyda 50,000 o bobl, a hwn oedd y lle mwyaf heddychlon y gallech fod," meddai.

“Roedd fel bod ar bererindod grefyddol, wyddoch chi?”

Ar ôl blynyddoedd o dynnu lluniau ar draws y byd, mae llawer o waith David bellach yn nes adref yn Nhyndyrn, lle mae wedi byw ers dros 50 mlynedd.

“Rydw i wedi dod, fwy neu lai, yn ffotograffydd pentref - ac rydw i wrth fy modd,” meddai.

“Felly, os yw Johnny’n cael parti pen-blwydd y penwythnos hwn, rydw i yno fel shot, ac rwy’n gymryd o, o  ddifrif, fel pe bawn i’n gweithio i Life Magazine…

“Rwy’n meddwl ei fod o’n beth mor rhydd, mor hyfryd. Rwyf wrth fy modd pan fydd pobl yn dod at ei gilydd ac yn cymdeithasu.”