Mae dyn 29 oed wedi marw mewn gwrthdrawiad ffordd ger Pentraeth ym Môn fore Sul. 

Dywedodd Heddlu'r Gogledd eu bod wedi derbyn adroddiadau o wrthdrawiad rhwng dau gerbyd ar yr A5025 ychydig wedi 06:45 rhwng Pen-Y-Garnedd a garej Pentraeth Automotive.

Roedd y gwrthdrawiad yn cynnwys cerbyd llwyd Peugeot 208 a cherbyd aur Audi A5 Quattro. 

Bu farw gyrrwr 29 oed y Peugeot yn y fan a'r lle, ac mae ei deulu wedi cael gwybod.

Fe gafodd gyrrwr 22 oed y cerbyd arall ei gludo i'r ysbyty gydag anafiadau difrifol.

Dywedodd y Ditectif Sarjant Katie Davies o Uned Plismona'r Ffyrdd Heddlu'r Gogledd: "Rwy'n rhannu fy nghydymdeimlad dwysaf â theulu'r dyn yn ystod yr amser anodd hwn.

“Rwy'n apelio ar unrhyw un a oedd yn gyrru ar hyd yr A5025 tua 06:30 ddydd Sul, ac a allai fod wedi gweld y digwyddiad - neu a allai fod â lluniau dashcam perthnasol - i gysylltu cyn gynted â phosibl."

Mae'r llu yn annog unrhyw un â gwybodaeth i gysylltu gan ddefnyddio'r cyfeirnod 26000067199.