Mae’r heddlu yn ymchwilio yn dilyn ymosodiad rhyw "difrifol" ar fenyw mewn parc yng Nghaerdydd yn ystod oriau man bore Sul.

Fe gafodd Heddlu De Cymru eu galw i Barc y Sblot am 03.25 fore Sul yn dilyn ymosodiad ar fenyw 44 oed. 

Wedi'r digwyddiad fe wnaeth y fenyw dynnu sylw aelod o’r cyhoedd, a wnaeth gysylltu â’r heddlu.

Mae’r llu yn cynnal ymholiadau wrth geisio cadarnhau amgylchiadau’r ymosodiad.

Mae’r fenyw yn derbyn cefnogaeth gan swyddogion heddlu arbenigol.

Fe fydd presenoldeb swyddogion yn y lleoliad wrth i’r ymchwilio barhau.

Dywedodd y Ditectif Arolygydd Kath Barry: “Os oeddech chi yng nghyffiniau Parc y Sblot rhwng 02.00 a 04.00 fore Sul ac wedi gweld unrhyw un yn yr ardal, neu os oes gennych unrhyw wybodaeth arall a allai gynorthwyo ein hymchwiliad, cysylltwch â ni.”

Gallai unrhyw un ag unrhyw wybodaeth gysylltu â Heddlu De Cymru gan ddyfynnu'r cyfeirnod 2400316906.

Llun: Geograph.org.uk