Mae Urdd Gobaith Cymru wedi cadarnhau mai Casnewydd fydd cartref Eisteddfod yr Urdd 2027, yn dilyn cyfarfod cyhoeddus yng Nghasnewydd nos Iau.

Cytunodd neuadd o wirfoddolwyr a chefnogwyr yn y cyfarfod yn Ysgol Gwent Is Coed, mewn pleidlais unfrydol, i estyn gwahoddiad i gynnal yr Eisteddfod yn y ddinas.

Hwn fydd y tro cyntaf erioed i Eisteddfod yr Urdd ymweld â Chasnewydd ac mae’r Urdd a Chyngor Dinas Casnewydd yn y broses o drafod safleoedd posib ar gyfer maes yr ŵyl.

Dywedodd Llio Maddocks, Cyfarwyddwr Eisteddfod yr Urdd a’r Celfyddydau: “Rwyf mor falch o weld cefnogaeth Cyngor Sir Casnewydd, a chymuned Rhanbarth Gwent gyfan i gynnal yr Eisteddfod yn 2027. 

"Un o elfennau pwysicaf Eisteddfod yr Urdd yw’r ffaith ei bod hi’n teithio, ac yn gallu ymweld ag ardaloedd sydd erioed wedi cynnal yr ŵyl. 

"Rwy’n edrych ymlaen yn fawr i gydweithio gyda’r Cyngor a’r gymuned dros y tair blynedd nesaf i gynnig profiadau gwerthfawr i blant a phobl ifanc yr ardal.”

'Balch iawn'

Dywedodd y Cynghorydd Emma Stowell-Corten, aelod cabinet dros gyfathrebu a diwylliant, Cyngor Dinas Casnewydd: “Rydym yn falch iawn bod Urdd Gobaith Cymru wedi cadarnhau mai Casnewydd fydd cartref Eisteddfod yr Urdd 2027. 

"Mae’n gyffrous meddwl y byddwn ni’n dod ag un o ddigwyddiadau blynyddol Cymru, ac un o wyliau ieuenctid mwyaf Ewrop, i’n dinas am y tro cyntaf erioed. 

"Braf oedd gweld cynifer yn dod i’r cyfarfod heno a chystal cefnogaeth o fewn ein cymuned i gynnal Eisteddfod yr Urdd yma."

Mae’r paratoadau wedi dechrau yng Nghastell-nedd Port Talbot, yr ardal fydd yn cynnal yr Eisteddfod flwyddyn nesaf medd yr Urdd. 

Cynhelir Eisteddfod yr Urdd Dur a Môr ym Mharc Margam rhwng 26 Mai – 31 Mai.

Bydd yr Ŵyl yn croesi’r bont i Ynys Môn yn 2026, cyn ymweld â Chasnewydd, rhanbarth Gwent yn 2027.