Pan deithiodd Bonnie Miles o’r Cymoedd i’r Almaen er mwyn gweld ei harwr yn canu, doedd hi ddim wedi disgwyl cael gwahoddiad i ganu ar y llwyfan.

Fe waeth Bonnie, 18 oed o Penrhiwceiber gymryd y cyfle arbennig pan ddaeth cais o’r llwyfan yn gofyn a oedd unrhyw un eisiau canu cyn i’r gantores Adele ddechrau ei set.

Roedd y gyngerdd yn rhan o daith 10 niwrnod ‘Munich Residency’ Adele dros yr haf.

Dywedodd Bonnie, “Roedd fy nheulu i gyd yn y gynulleidfa, ac roedden nhw yn pwyntio a sgrechian i gael fi i fynd lan i ganu, a naethon nhw ddewis fi.

“Yn syth ar ôl i fi fynd ar y llwyfan a dewis fy nghân, fe wnes i droi rownd yn syth a dechrau crynu wrth weld y miloedd o bobl oedd yn edrych arna i ac yn aros i glywed fi yn canu.

“Roedd y profiad wedi rhoi teimlad i fi na allai esbonio, teimlad o hunan falchder.”

'Cyfle unwaith mewn oes'

Ers yn ifanc, canu a cherddoriaeth yw popeth i Bonnie. Mae’r profiad diweddar wedi ei gwneud yn “fwy penderfynol” i ganu a gweld ei breuddwydion yn dod yn wir. 

“Rwy’n hyderus mai dim ond y dechrau yw hyn ac y bydd fy nhaith yn parhau i ddatblygu. Dwi wedi breuddwydio am hyn ers blynyddoedd, a 'dw i wedi cael cyfle unwaith mewn oes.

“Wedi fy magu yn y Cymoedd, roeddwn yn aml yn amau fy ngallu i gyflawni cerrig milltir arwyddocaol yn fy ngyrfa ganu.

“Hwn oedd y profiad mwyaf brawychus i mi ei wynebu erioed, ac eto dyma'r peth mwyaf rwyf wedi ei gyflawni  hyd yn hyn.”