Mae’r seren baralympaidd Aled Siôn Davies wedi dweud ei fod yn “hynod siomedig” gyda’i berfformiad ar ôl ennill medal arian yn y taflu pwysau (shot put) nos Sadwrn.

Enillodd y dyn o Gaerdydd fedal aur ar daflu disgen yng Ngemau Paralympaidd Llundain 2012, a medalau aur am daflu pwysau yn Rio a Tokyo.

Ond dywedodd ei fod yn teimlo y gallai fod wedi gwneud yn well ar ôl ennill medal arian gyda thafliad gorau o 15.10m yn ei bedwaredd Gemau Paralympaidd ym Mharis.

Cipiodd Faisal Sorour o Kuwait y fedal aur gyda thafliad o 15.31m.

“Y peth mwyaf siomedig oedd fy mherfformiad fy hun,” meddai wrth Sportsbeat.

“Byddwn wedi bod yn hapus dod yn olaf cyn belled â fy mod yn rhoi’r perfformiad gorau y gallwn ond yn anffodus wnes i ddim.”

Ychwanegodd: “Mae’n un anodd, mae wedi bod yn daith emosiynol i gyrraedd yma. Mae’r blynyddoedd diwethaf wedi bod yn rhai creulon.

“Rwy'n dal i deimlo mai fi yw'r gorau a heno fe wnes i danberfformio. Nid fy noson i oedd hi.

“Fe ddes i mewn iddo gan feddwl ‘Rydw i’n mynd i dorri record byd heno a thaflu dros 17 metr.

"Rydw i wedi bod mor ddiamynedd yn dechnegol eleni oherwydd anafiadau ond does dim esgusodion, fe wnes i danberfformio.

“Mae’n un anodd ei lyncu ond mae’n bryd mynd yn ôl a darganfod beth aeth o’i le.”