Mae llys wedi clywed honiad bod menyw sydd wedi ei chyhuddo o lofruddio ei mab chwech oed yn Abertawe hefyd wedi ceisio llofruddio ei thad yr un diwrnod.

Fe wnaeth Karolina Zurawska, o Gendros, Abertawe, ymddangos o flaen Llys y Goron y ddinas fore Mawrth.

Mae’r fenyw 41 oed wedi’i chyhuddo o lofruddio Alexander Zurawski, a gafodd ei ddarganfod yn farw mewn eiddo yng Nghlos Cwm Du, Gendros, ddydd Iau 29 Awst.

Mae Zurawska hefyd wedi’i chyhuddo o geisio llofruddio ei thad, Krzysztof Siwi, 67, yn gynharach yr un diwrnod.

Yn ystod gwrandawiad byr, siaradodd Zurawska i gadarnhau ei henw yn unig ac a oedd hi’n gallu clywed yr achos.

Ni wnaeth y diffynnydd, a ymddangosodd trwy gyswllt fideo o'r carchar, bledio i'r ddau gyhuddiad yn ei herbyn.

Dywedodd y Barnwr Paul Thomas wrth y llys: “Bydd yr achos llys ar Chwefror 17.

“Bydd rhaid i’r diffynnydd aros yn y ddalfa.”

Ymddangosodd Michael Jones ar ran yr erlyniad, tra bod Robin Rouch yn cynrychioli'r diffynnydd.

Mae disgwyl i’r achos llys ar Chwefror 17 barhau rhwng wythnos a phythefnos.

‘Bachgen hynod annwyl a phoblogaidd’

Mae teulu Alexander a phennaeth Ysgol Gynradd Whitestone wedi rhoi teyrnged iddo.

Dywedodd ei deulu mewn teyrnged: “Roedd Alexander yn blentyn caredig iawn. Roedd wrth ei fodd yn chwarae gyda’i chwaer fach ac yn chwarae gyda’i gi, Daisy.

“Roedd Alexander bob amser yn ymddwyn yn dda a byth yn ddrwg.

“Roedd yn glyfar iawn ac yn aeddfed iawn am ei oedran. Roedd ganddo ddealltwriaeth wych o ffeithiau.

“Roedd Alexander bob amser yn barod i helpu, bob amser yn awyddus i helpu gyda choginio a glanhau."

Ychwanegodd y deyrnged: “Roedd Alexander yn siarad Saesneg a Phwyleg a byddai’n aml yn cywiro ei rieni gyda’u Saesneg os oedden nhw’n cael geiriau’n anghywir.

“Roedd yn anhygoel.”

Dywedodd Heddlu De Cymru bod y teulu wedi gofyn am breifatrwydd ar yr adeg anodd hon. Fe wnaeth y teulu hefyd fynegi eu diolch i’r gwasanaethau brys. 

Dywedodd Bethan Peterson, Pennaeth Ysgol Gynradd Whitestone: “Rydym wedi ein syfrdanu o glywed am farwolaeth drasig Alexander.

“Roedd Alexander yn fachgen bach hoffus, penderfynol ac roedd ei agwedd bositif a’i ddycnwch yn sicrhau ei fod yn llwyddo ym mhopeth yr oedd yn ei wneud.

“Roedd yn fachgen hynod annwyl a phoblogaidd ymhlith ei gyfoedion, staff a phawb oedd yn ei adnabod. Bydd colled fawr ar ei ôl."

‘Sioc’

Dywedodd y Prif Uwcharolygydd Chris Truscott, rheolwr rhanbarthol Abertawe a Chastell-nedd Port Talbot ddydd Sul bod y digwyddiad wedi bod yn "sioc aruthrol i’r gymuned leol."

“Mae’r gymuned leol wedi bod yn rhagorol wrth ein cefnogi gyda'n hymchwiliad, a hoffem ddiolch i bob un ohonynt am eu hamynedd yn ystod cyfnod trawmatig.

“Bydd presenoldeb yr heddlu yn parhau yn yr ardal leol dros y dyddiau nesaf er mwyn rhoi cyngor a sicrwydd.

“Mae ein meddyliau gyda theulu a ffrindiau Alexander ar yr amser anodd hwn.”

Llun: Alexander Zurawski (Heddlu De Cymru)